RM Sotheby’s auksioni orqali Toyota tarixidagi eng qimmat modellardan biri sotildi. Amerikalik poygachi Otto Lintonga tegishli bo‘lgan 53 yoshli noyob 2000GT kupe 912 ming dollarga xarid qilingan, deb xabar beradi Motor.
Toyota 2000GT yapon markasining konveyridan bozorga chiqqan sport avtomobillari orasidagi birinchi model hisoblanadi. Model Yamaha muhandislari bilan hamkorlikda yaratilgan bo‘lib, uning kuzovi suyri shaklda, shuningdek, 150 ot kuchiga ega olti silindrli Toyota Crown seriyali dvigateliga ega. Modifikatsiyaga uchragan motor besh pog‘onali mexanik uzatmalar qutisi yordamida boshqariladi. Kupe soatiga 100 kilometr tezlikka 10 soniyada erishadi, maksimal tezligi — 220 km/soat.
1967-yildan 1970-yilga qadar yaponiyalik mutaxassislar 2000GT sportkaridan jami 351 nusxa yig‘gan. Ulardan 62 tasida rul chap tarafda joylashgan va kupelar AQShga jo‘natilgan. Shu kabi nusxalardan biri auksion orqali sotuvga qo‘yilgan. Sportkarning birinchi egasi avtopoygachi Otto Linton bo‘lib, u 30 yil davomida ushbu mashinani boshqargan. Model uzoq vaqt Yaponiyadagi eng tezkor mashina bo‘lib kelgan va u Jaguar E-Type, Porsche 911 va Chevrolet Corvette’dan ham qimmatroq turgan.
Mashinaning so‘nggi egasi 2010-yillarda kompleks restavratsiyani amalga oshirgan: qizil kuzov va qora charm bilan qoplangan salon dastlabki holatiga keltirilgan. Kupe 912 ming dollarga sotilgan bo‘lib, u Toyota tarixidagi eng qimmat avtomobillardan biriga aylangan.
Avvalroq Rossiyada Porsche’ning dunyodagi ilk sportkarlaridan biri sotuvga qo‘yilgani to‘g‘risida xabar berilgandi.
Izoh (0)