Fransiyaning Avinyon kommunasida pichoq ko‘targan erkak politsiyachilarga hujum uyushtirgan, oqibatda huquq-tartibot idoralarining xodimlari uni otib tashlagan. Bu haqda Europe 1 va Midi Libre xabar tarqatdi.

Foto: Reuters

Sodir bo‘lgan voqea yuzasidan tergov ishlari boshlangan.

Europe 1 nashrining qayd etishicha, hodisa mahalliy vaqt bilan 11:15 da (Toshkent vaqti bilan 15:15) yuz bergan. Pichoq ko‘targan kishi dastlab ko‘chadagilarga tahdid qilgan, so‘ngra politsiya xodimiga tashlangan.

Avval Nitssada pichoq ko‘targan erkak Notr-Dam bazilikasi mehmonlariga hujum qilgan va uch kishini pichoqlab o‘ldirgani xabar qilingandi. Ayollardan birining boshi olingani haqida xabarlar mavjud. Qotil qo‘lga olinish vaqtida og‘ir jarohatlagan.

Hozircha jinoyatchining shaxsi va hujum sabablari haqida hech narsa xabar qilinmagan. Nitssa shahar hokimi Kristian Estrosining ta’kidlashicha, voqea terrorchilik hujumi belgilariga ega. Ichki ishlar vazirligi huzurida voqeani tekshirish uchun vazir Gerald Darmanen boshchiligidagi maxsus shtab tashkil etilgan.

Eslatib o‘tamiz, Fransiyada tarix fani o‘qituvchisi o‘quvchilarga Charlie Hebdo nashri tomonidan chop etilgan Payg‘ambar Muhammad (s.a.v.)ning karikatura suratini ko‘rsatgan. Shundan so‘ng o‘qituvchi chechenistonlik muhojir tomonidan o‘ldirilgan. Bu voqea Fransiyada keng jamoatchilikning muhokamasiga sabab bo‘ldi. O‘ldirilgan o‘qituvchi bilan vidolashish marosimida Fransiya prezidenti Emmanuel Makron mamlakat so‘z erkinligidan, jumladan, karikatura borasidagi erkinlikdan voz kechmasligini ma’lum qilgan. Fransiya prezidentining mazkur bayonoti ortidan Yaqin Sharqdagi ba’zi mamlakatlarda Fransiyada ishlab chiqarilgan mahsulotlarni boykot qilish boshlangan.

2019-yilning oktabr oyida pichoq bilan qurollangan shaxs mamlakat poytaxti Parijdagi markaziy politsiya idorasida to‘rt nafar politsiya zobitini pichoqlab o‘ldirgan, keyinchalik qotilning boshqalarga xavf soladigan xulq-atvor egasi bo‘lmaganligi, kar-soqov bo‘lgani, mudhish voqeaga xodimlar o‘rtasida nizo chiqishi sabab ekani taxmin qilingandi. Voqeadan keyin Fransiya Respublikachilar fraksiyasi rahbari Kristian Yakob Parijdagi politsiya shtab-kvartirasida yuz bergan 4 nafar politsiyachining o‘ldirilishi sabab parlamentda bu ish bo‘yicha tergov komissiyasini tuzishni taklif etib, o‘sha vaqtdagi Fransiya ichki ishlar vaziri Kristof Kastanerning iste’fosini talab qilgan.