“3-4 kunlab mast holda xonasidan chiqmagan va klubni provokatsiya qilish uchun atayin maoshini vaqtida olmagan”. “Navbahor” Andrey Kanchelskisning iste’fosi haqida

“Navbahor” futbol klubi matbuot xizmati jamoa sobiq bosh murabbiyi Andrey Kanchelskis nima sababdan iste’foga chiqarilgani haqida ma’lumot berdi.

Avvalroq rossiyalik mutaxassis maoshlarning vaqtida berilmaganidan noligan, klub rahbariyati bilan munosabatlarida muammolar yuzaga kelganligi va Namangan viloyat hokimining almashganligi sabab klubni tark etishga to‘g‘ri kelgani haqida gapirgandi.

Quyida klub matbuot xizmatining bayonoti to‘liqligicha keltiriladi.

“Navbahor” PFK Andrey Kanchelskisning iste’foga chiqarilishi sabablarini quyidagilar bilan izohlaydi:

• jamoaning natijalari salbiy tus olganligi  (ya’ni, “Navbahor”ning uning murabbiyligida so‘nggi 9 ta o‘yinda g‘alaba qozona olmaganligi);
• klub rahbariyati, hamkasblari va muxlislar orasida o‘zining yaxshi mutaxassis ekanligini isbotlab bera olmaganligi;
• klub rahbariyati tomonidan bildirilgan ogohlantirishlarga e’tiborsizlik qilganligi, ayrim holatlarda spirtli ichimliklar iste’mol qilganligi hamda ushbu xatti-harakatlari bilan o‘z obro‘siga putur yetkazganligi.

Andrey Kanchelskisning oylik maoshlarni o‘z vaqtida berilmaganligi borasidagi fikriga to‘xtaladigan bo‘lsak, klub rahbariyati tomonidan rossiyalik murabbiyga maoshlari berilganida u atayin, provokatsiya uyushtirish maqsadida maoshni olishdan bosh tortgan. Buning sababi esa endi oydinlashmoqda. U bu ishni amalga oshirish bilan “Navbahor”dan ko‘proq kompensatsiya puli undirishni rejalashtirgan.

Shuningdek, Coca Cola Superligasining 10—13-turlari markazlashgan holda, Toshkentda o‘tkazilganida, uspirtli ichimliklar iste’mol qilgan holda, 3-4 kunlab xonasidan chiqmagan. Jamoa mashg‘ulotlarini esa yordamchi murabbiylar o‘tkazgan.

Shuningdek Superliga 18-turidan o‘rin olgan 1-oktabr kuni Buxoroda o‘tkazilgan “Buxoro” — “Navbahor” (0:0) uchrashuvidan so‘ng, klub rahbariyati tomonidan jamoaning qoniqarsiz natijalarini tahlil qilish maqsadida murabbiylar shtabiga yig‘ilish o‘tkazilishi borasida xat berilgan. Biroq rossiyalik mutaxassis turli bahonalarni ro‘kach qilgan holda, mazkur yig‘ilishga tashrif buyurmadi. Kanchelskis “Buxoro”ga qarshi kechgan bahsdan so‘ng, Namanganga qaytmay, Rossiya poytaxti Moskvaga jo‘nab ketdi.

Yana shuni ham ta’kidlash joizki, rossiyalik mutaxassisga klub tomonidan barcha sharoitlar yaratib berilgandi. Lekin Andrey Kanchelskis shunga yarasha ijobiy natija qayd eta olmadi.             .

Yuqoridagilarni inobatga olgan holda, rossiyalik mutaxassisning nega iste’foga chiqarilganligini bilish uchun uning murabbiyligidagi so‘nggi 9 o‘yin natijasi hamda musobaqa jadvalidagi holatga nazar tashlash kifoya. Buni futboldan xabari bor har qanday muxlis yaxshi tushunadi.

Xullas,“Navbahor”ning rossiyalik sobiq bosh murabbiyi Andrey Kanchelskisning klub rahbariyati tomonidan iste’foga chiqarilishining obyektiv va subyektiv sabablari shulardan iborat. Boshqa har qanday gap-so‘zlar esa safsatadan o‘zga narsa emas.

“Navbahor” futbol klub matbuot xizmati