«3-4 кунлаб маст ҳолда хонасидан чиқмаган ва клубни провокация қилиш учун атайин маошини вақтида олмаган». «Навбаҳор» Андрей Канчельскиснинг истеъфоси ҳақида

«Навбаҳор» футбол клуби матбуот хизмати жамоа собиқ бош мураббийи Андрей Канчельскис нима сабабдан истеъфога чиқарилгани ҳақида маълумот берди.

Аввалроқ россиялик мутахассис маошларнинг вақтида берилмаганидан нолиган, клуб раҳбарияти билан муносабатларида муаммолар юзага келганлиги ва Наманган вилоят ҳокимининг алмашганлиги сабаб клубни тарк этишга тўғри келгани ҳақида гапирганди.

Қуйида клуб матбуот хизматининг баёноти тўлиқлигича келтирилади.

«Навбаҳор» ПФК Андрей Канчельскиснинг истеъфога чиқарилиши сабабларини қуйидагилар билан изоҳлайди:

• жамоанинг натижалари салбий тус олганлиги  (яъни, «Навбаҳор»нинг унинг мураббийлигида сўнгги 9 та ўйинда ғалаба қозона олмаганлиги);
• клуб раҳбарияти, ҳамкасблари ва мухлислар орасида ўзининг яхши мутахассис эканлигини исботлаб бера олмаганлиги;
• клуб раҳбарияти томонидан билдирилган огоҳлантиришларга эътиборсизлик қилганлиги, айрим ҳолатларда спиртли ичимликлар истеъмол қилганлиги ҳамда ушбу хатти-ҳаракатлари билан ўз обрўсига путур етказганлиги.

Андрей Канчельскиснинг ойлик маошларни ўз вақтида берилмаганлиги борасидаги фикрига тўхталадиган бўлсак, клуб раҳбарияти томонидан россиялик мураббийга маошлари берилганида у атайин, провокация уюштириш мақсадида маошни олишдан бош тортган. Бунинг сабаби эса энди ойдинлашмоқда. У бу ишни амалга ошириш билан «Навбаҳор»дан кўпроқ компенсация пули ундиришни режалаштирган.

Шунингдек, Coca Cola Суперлигасининг 10—13-турлари марказлашган ҳолда, Тошкентда ўтказилганида, успиртли ичимликлар истеъмол қилган ҳолда, 3-4 кунлаб хонасидан чиқмаган. Жамоа машғулотларини эса ёрдамчи мураббийлар ўтказган.

Шунингдек Суперлига 18-туридан ўрин олган 1 октябрь куни Бухорода ўтказилган «Бухоро» — «Навбаҳор» (0:0) учрашувидан сўнг, клуб раҳбарияти томонидан жамоанинг қониқарсиз натижаларини таҳлил қилиш мақсадида мураббийлар штабига йиғилиш ўтказилиши борасида хат берилган. Бироқ россиялик мутахассис турли баҳоналарни рўкач қилган ҳолда, мазкур йиғилишга ташриф буюрмади. Канчельскис «Бухоро»га қарши кечган баҳсдан сўнг, Наманганга қайтмай, Россия пойтахти Москвага жўнаб кетди.

Яна шуни ҳам таъкидлаш жоизки, россиялик мутахассисга клуб томонидан барча шароитлар яратиб берилганди. Лекин Андрей Канчельскис шунга яраша ижобий натижа қайд эта олмади.             .

Юқоридагиларни инобатга олган ҳолда, россиялик мутахассиснинг нега истеъфога чиқарилганлигини билиш учун унинг мураббийлигидаги сўнгги 9 ўйин натижаси ҳамда мусобақа жадвалидаги ҳолатга назар ташлаш кифоя. Буни футболдан хабари бор ҳар қандай мухлис яхши тушунади.

Хуллас,«Навбаҳор»нинг россиялик собиқ бош мураббийи Андрей Канчельскиснинг клуб раҳбарияти томонидан истеъфога чиқарилишининг объектив ва субъектив сабаблари шулардан иборат. Бошқа ҳар қандай гап-сўзлар эса сафсатадан ўзга нарса эмас.

«Навбаҳор» футбол клуб матбуот хизмати