Yaponiyada ishlash istagidagi O‘zbekiston fuqarolariga Toshkentda til va kasb o‘rgatiladi

O‘zbekiston Bandlik va mehnat munosabatlari vazirligida 2019-yil 28-dekabrdagi “O‘zbekiston Respublikasi va Yaponiya o‘rtasida ikki tomonlama hamkorlikni yanada kengaytirish va mustahkamlash chora-tadbirlari to‘g‘risida”gi hamda 2020-yil 15-sentabrdagi “Xavfsiz, tartibli va qonuniy mehnat migratsiyasi tizimini joriy qilish chora-tadbirlari to‘g‘risida”gi Prezident qarorlari ijrosini ta’minlash maqsadida videokonferensaloqa shaklida uchrashuv tashkil etildi. Bu haqda Tashqi mehnat migratsiyasi agentligi xabar berdi.

Shuningdek, uchrashuvda 2019-yil 17-dekabrdagi “Maxsus malakali ishchilar” maqomiga ega bo‘lgan xorijiy mehnat resurslarini ishga qabul qilish tizimini amalga oshirish to‘g‘risidagi o‘zaro hamkorlik Memorandumining ijrosi ham muhokama qilindi.

Uchrashuvda O‘zbekiston Bandlik va mehnat munosabatlari va Yaponiya Adliya vazirliklari, O‘zbekistonning Yaponiyadagi elchixonasi, Yaponiyaning O‘zbekistondagi elchixonasi, Tashqi mehnat migratsiyasi agentligi mas’ul xodimlari ishtirok etdi. Muhokamalar ikki davlat o‘rtasida tartibli va xavfsiz mehnat migratsiyasida hamkorlikni yanada kengaytirish, Yaponiyada mehnat faoliyatini amalga oshirish istagida bo‘lgan fuqarolarga O‘zbekiston hududida yapon standartlariga mos keladigan boshlang‘ich darajadagi yapon tilini o‘qitish, zarur bo‘lgan kasblarga tayyorlash masalalariga alohida e’tibor qaratilayotgani ta’kidlandi.

O‘zbekiston Prezidentining Yaponiyaga tashrifi doirasida imzolangan “Maxsus malakali ishchilar” maqomiga ega bo‘lgan xorijiy mehnat resurslarini ishga qabul qilish tizimini amalga oshirish to‘g‘risidagi o‘zaro hamkorlik Memorandumiga muvofiq, fuqarolarni “Maxsus malakali ishchilar” maqomida Yaponiyada ishlash uchun yuborish tizimini joriy etish uchun Toshkent shahrida yapon tili va malaka imtihonlarini o‘tkazuvchi test markazini ochish masalalari muhokama qilindi.

Memorandum asosida Yaponiya o‘z mehnat bozorini O‘zbekiston uchun ochib berdi. Bugungi kungacha mingdan ortiq O‘zbekiston fuqarosi Yaponiyada ishlash uchun o‘z ehtiyojini bildirgan. Mazkur davlatning sanoat, qurilish, qishloq xo‘jaligi va uy xo‘jaligi sohalari bo‘yicha 345 mingta xorijiy ishchiga ehtiyoji mavjud. Ayni paytda “Ishga marhamat” monomarkazida yapon tili va kasb-hunarga o‘qitish markazi ochilgan bo‘lib, Yaponiyada ishlash istagidagi fuqarolarga til va kasb o‘rgatiladi.