Японияда ишлаш истагидаги Ўзбекистон фуқароларига Тошкентда тил ва касб ўргатилади

Ўзбекистон Бандлик ва меҳнат муносабатлари вазирлигида 2019 йил 28 декабрдаги «Ўзбекистон Республикаси ва Япония ўртасида икки томонлама ҳамкорликни янада кенгайтириш ва мустаҳкамлаш чора-тадбирлари тўғрисида»ги ҳамда 2020 йил 15 сентябрдаги «Хавфсиз, тартибли ва қонуний меҳнат миграцияси тизимини жорий қилиш чора-тадбирлари тўғрисида»ги Президент қарорлари ижросини таъминлаш мақсадида видеоконференцалоқа шаклида учрашув ташкил этилди. Бу ҳақда Ташқи меҳнат миграцияси агентлиги хабар берди.

Шунингдек, учрашувда 2019 йил 17 декабрдаги «Махсус малакали ишчилар» мақомига эга бўлган хорижий меҳнат ресурсларини ишга қабул қилиш тизимини амалга ошириш тўғрисидаги ўзаро ҳамкорлик Меморандумининг ижроси ҳам муҳокама қилинди.

Учрашувда Ўзбекистон Бандлик ва меҳнат муносабатлари ва Япония Адлия вазирликлари, Ўзбекистоннинг Япониядаги элчихонаси, Япониянинг Ўзбекистондаги элчихонаси, Ташқи меҳнат миграцияси агентлиги масъул ходимлари иштирок этди. Муҳокамалар икки давлат ўртасида тартибли ва хавфсиз меҳнат миграциясида ҳамкорликни янада кенгайтириш, Японияда меҳнат фаолиятини амалга ошириш истагида бўлган фуқароларга Ўзбекистон ҳудудида япон стандартларига мос келадиган бошланғич даражадаги япон тилини ўқитиш, зарур бўлган касбларга тайёрлаш масалаларига алоҳида эътибор қаратилаётгани таъкидланди.

Ўзбекистон Президентининг Японияга ташрифи доирасида имзоланган «Махсус малакали ишчилар» мақомига эга бўлган хорижий меҳнат ресурсларини ишга қабул қилиш тизимини амалга ошириш тўғрисидаги ўзаро ҳамкорлик Меморандумига мувофиқ, фуқароларни «Махсус малакали ишчилар» мақомида Японияда ишлаш учун юбориш тизимини жорий этиш учун Тошкент шаҳрида япон тили ва малака имтиҳонларини ўтказувчи тест марказини очиш масалалари муҳокама қилинди.

Меморандум асосида Япония ўз меҳнат бозорини Ўзбекистон учун очиб берди. Бугунги кунгача мингдан ортиқ Ўзбекистон фуқароси Японияда ишлаш учун ўз эҳтиёжини билдирган. Мазкур давлатнинг саноат, қурилиш, қишлоқ хўжалиги ва уй хўжалиги соҳалари бўйича 345 мингта хорижий ишчига эҳтиёжи мавжуд. Айни пайтда «Ишга марҳамат» мономарказида япон тили ва касб-ҳунарга ўқитиш маркази очилган бўлиб, Японияда ишлаш истагидаги фуқароларга тил ва касб ўргатилади.