Turkiya g‘arbidagi zilzilada halok bo‘lganlar soni 43 kishiga yetdi, deya xabar bermoqda “RIA Novosti”, respublika favqulodda holatlar va tabiiy ofatlar agentligiga tayanib.
“So‘nggi ma’lumotlarga ko‘ra, 43 kishi halok bo‘lgan, 896 kishi jabrlangan… Izmirda qutqaruvchilar qulab tushgan to‘qqizta bino vayronalarida ish olib bormoqda”, deyiladi xabarda.
Eslatib o‘tamiz, 30-oktabr kuni tushdan keyin Turkiyaning g‘arbiy qismida 6,6 balli zilzila sodir bo‘ldi. Zilzila epimarkazi Egey dengizida, Izmir viloyatining Seferihisar shahri yaqinida bo‘lgan.
Izmirda kamida 20 ta bino qulab tushgani xabar qilindi. Zilzila kichik sunamini keltirib chiqardi, oqibatda Seferihisarning qirg‘oq ko‘chalarini suv bosdi.
Zilzila kuchi Gretsiya orollarida ham sezildi. Grek seysmologlari uning kuchini 6,9 ball deb baholadi. Zilzila oqibatida Gretsiyaning Samos orolida ikki kishi halok bo‘ldi va 20 kishi jarohat oldi. Orolda 6 oylik favqulodda holat e’lon qilindi.
Avvalroq zilzilada halok bo‘lgan yoki jarohat olganlar orasida O‘zbekiston fuqarolari yo‘qligi ma’lum qilindi. Shuningdek, Prezident Shavkat Mirziyoyev Turkiyada yuz bergan zilzila sababli Rajab Toyyib Erdo‘g‘onga hamdardlik bildirdi.
Izoh (0)