Angliyada Airbnb orqali keng dalada joylashgan oynasi, devori va tomi yo‘q “mehmonxona nomeri”da tunash mumkin bo‘ldi (video)

Angliyalik Ris va Jeymi ismli ikki do‘st internet orqali Shveysariyada joylashgan “nol yulduzli mehmonxona”ga duch keldi. Unda deyarli hech narsa yo‘q: hatto tom va devorlar ham, faqat ikki o‘rinli karavot va bir juft tumbochka mavjud. Ammo Alp tog‘larida ochiq osmon ostida maza qilib hordiq chiqarish mumkin, deb yozadi Meduza.

Ikki do‘stga ushbu g‘oya yoqib qolganidan ular London atrofidagi dalada ham shu kabi “mehmonxona” qurishga va “Airbnb’dagi eng yomon joy”ni yaratishga qaror qilgan. “Mehmonxona nomeri” uchun kerak bo‘ladigan barcha zarur narsalar — matras, ko‘rpa, ikkita yostiq, tumbochka, stol lampasi va ikkita stakanni Ris va Jeymi Facebook Marketplace’dan topgan.

Matrasni olib kelish kutilganidek oson kechmagan — uni skotch bilan mashinaning tom qismiga boylashga va oynalarini tushirgan holda harakatlanishga to‘g‘ri kelgan. Ammo do‘stlar buni uddalagan va bularning barchasi zoye ketmagan.

“Mehmonxona nomeri” Airbnb’da paydo bo‘lgach, potensial mehmonlardan so‘rovlar kelib tusha boshlagan. Ris va Jeymi, albatta, buni kutmagan. Odamlar yomg‘ir yog‘sa nima bo‘lishi va “nomer”da konditsioner va kiyim ilgich bor-yo‘qligi bilan qiziqa boshlagan.

Ikki do‘st agar video mingta layk yig‘sa, mehmonlarni qabul qilishga uringani tasvirlangan ikkinchi qismni taqdim etishni va’da qilgan.