Англияда Airbnb орқали кенг далада жойлашган ойнаси, девори ва томи йўқ «меҳмонхона номери»да тунаш мумкин бўлди (видео)

Англиялик Рис ва Жейми исмли икки дўст интернет орқали Швейцарияда жойлашган «ноль юлдузли меҳмонхона»га дуч келди. Унда деярли ҳеч нарса йўқ: ҳатто том ва деворлар ҳам, фақат икки ўринли каравот ва бир жуфт тумбочка мавжуд. Аммо Алп тоғларида очиқ осмон остида маза қилиб ҳордиқ чиқариш мумкин, деб ёзади Meduza.

Икки дўстга ушбу ғоя ёқиб қолганидан улар Лондон атрофидаги далада ҳам шу каби «меҳмонхона» қуришга ва «Airbnb’даги энг ёмон жой»ни яратишга қарор қилган. «Меҳмонхона номери» учун керак бўладиган барча зарур нарсалар — матрас, кўрпа, иккита ёстиқ, тумбочка, стол лампаси ва иккита стаканни Рис ва Жейми Facebook Marketplace’дан топган.

Матрасни олиб келиш кутилганидек осон кечмаган — уни скотч билан машинанинг том қисмига бойлашга ва ойналарини туширган ҳолда ҳаракатланишга тўғри келган. Аммо дўстлар буни уддалаган ва буларнинг барчаси зое кетмаган.

«Меҳмонхона номери» Airbnb’да пайдо бўлгач, потенциал меҳмонлардан сўровлар келиб туша бошлаган. Рис ва Жейми, албатта, буни кутмаган. Одамлар ёмғир ёғса нима бўлиши ва «номер»да кондиционер ва кийим илгич бор-йўқлиги билан қизиқа бошлаган.

Икки дўст агар видео мингта лайк йиғса, меҳмонларни қабул қилишга урингани тасвирланган иккинчи қисмни тақдим этишни ваъда қилган.