«Жами 198 мингта кепка харид қилинган». ДТМ расмийси 13,4 млрд сўмлик кепкалар харид қилингани тўғрисидаги хабарларга изоҳ берди

Давлат тест маркази сентябрь ойида тест синовларини ўтказишда абитуриентларга тарқатиш учун тўғридан-тўғри шартнома тузиш орқали 13,4 миллиард сўмлик кепка, қўлқоп, тиббий ниқоб, сув ва ручка харид қилгани тўғрисида хабар берилганди. АОКАда ўтказилган матбуот анжуманида ДТМ директори ўринбосари Сардор Ражабов марказ томонидан жами 198 мингта кепка харид қилинганини маълум қилди.

Тестлар бошланишидан олдин ўтказилган матбуот анжуманида кепка сотиб олиш учун тегишли рухсатнома сал кечикаётганлиги сабабли бош кийим бериш ёки бера олмаслигимиз аниқ эмаслиги тўғрисида маълумот берилганди. У тасдиқлангач, 1,3 миллион абитуриентга кепка етказиб бериш учун 7 та корхона билан ишлаганмиз.

…Барчага кепка етказиб берила олмади. ДТМ томонидан жами 198 мингта кепка харид қилинган. Ижтимоий тармоқларда «Бобурхон бн Нодирхон» деган корхона билан тузилган шартнома нусхаси қўйилган. Улар билан 1 миллионта кепка етказиб бериш бўйича шартнома тузилган, лекин бу ташкилот томонидан бор-йўғи 69 506 та кепка тақдим этилган. Бошқа кепка етказиб бера олмаган. Бизга тақдим этилган нархларни орасидаги энг паст нарх шуларга тегишли эди.

Қолган ташкилотлар билан шартнома тузишга маҳаллий ҳокимликлар ёрдам берди. Улар ўзидаги кепка ишлаб чиқарадиган корхоналар билан шартнома тузиб бизга юборди, ДТМ эса пулини тўлаб берган.

«Бобурхон бн Нодирхон» билан 7 миллиард сўмга тузилган шартнома бажарилмагани сабабли 69 506 та кепка учун пул тўланган.

Сардор Ражабов, ДТМ директори ўринбосари

Давлат харидлари портал маълумотларига кўра, ДТМ республика бўйлаб тест синовларини ўтказишга жалб қилинган ходимларнинг овқатланишига 1 миллиард 550 миллион сўмга яқин маблағ сарфланган.Эслатиб ўтамиз, Давлат тест маркази директори Мажид Каримов 12 августда олий таълим муассасаларига кириш учун ўтказиладиган имтиҳонлар вақтида абитуриентларга тиббий воситалар, ручка ва ичимлик суви бепул берилиши, шунингдек вазият эътиборга олиниб, уларга бош кийим бериш режалаштирилаётганини маълум қилганди. У мазкур буюмларнинг ҳаммаси давлат томонидан бепул берилишини айтган ва бош кийим ҳам текинга берилишини қўшимча қилган. Кейинчалик ДТМ ахборот хизмати 2020/2021-ўқув йили учун олий таълим муассасаларининг бакалавриат таълим йўналишларига кириш тест синовлари очиқ майдонларда ташкил этилаётгани сабабли, абитуриентлар хоҳишига кўра тест синовларига бош кийим (кепка) билан келишлари мумкинлигини билдирган. 2 сентябрда Фарғонада имтиҳонга келган абитуриентларга дўппи тарқатилган.