Qirg‘iziston adliya vaziri Ayaz Bayetov shifokorlarga choy-chaqa berishni qonuniylashtirishni taklif qildi. Amaldor buni girgittonlarga choy-chaqa berilsa, normal qaralishi, biroq tibbiyot xodimlariga aksinchaligi bilan izohladi.
Vazir o‘z taklifini Davlat tizimini byurokratiyadan xoli qilish bo‘yicha idoralararo komissiya majlisida bildirgan. U moliyaviy mustaqillik doirasida “ixtiyoriy hamkorlik to‘lovi” tushunchasini ko‘rib chiqishni ilgari surgan. Bunday to‘lov faqat kassa orqali amalga oshiriladi va raqamli nazoratda bo‘ladi.
Taklif tibbiyot muassasalarida shifokorlar yetishmasligi, shuningdek, majburiy hamkorlik to‘lovining standart jarayonlari doirasidagi byurokratik qiyinchiliklar bilan bog‘liq, dedi Ayaz Bayetov.
Ta’kidlanishicha, tibbiyot xodimlariga ixtiyoriy qo‘shimcha to‘lov yoki choy-chaqa berishni qonuniylashtirish taklifi Vazirlar Mahkamasining rasmiy pozitsiyasi emas. Mahkama raisi o‘rinbosari Edil Baysalovga ko‘ra, davlat siyosati yaqin 3-4 yil ichida shifokorlar va tibbiyot xodimlari mehnatiga munosib haq to‘lashni ta’minlashdan iborat.
“Shifokor va hamshira har daqiqada oilasini boqishni o‘ylamasdan, xalqiga xizmat qila olishi nuqtayi nazaridan munosib. Albatta, ofitsiantga beriladigan choy puli bilan taqqoslash har qanday tibbiyot xodimi uchun haqoratli. Bunday to‘lovlarni qandaydir legallashtirish urinishlari esa o‘tgan yillardan qolgan inersiyadir...
Bizda xususiy tibbiyot bor. Bugun shifokorlarda ham, bemorlarda ham tanlash imkoniyati mavjud. Kelgusi yillarda xalq salomatligi bo‘yicha davlat majburiyatlarini amalga oshirish siyosati bosqichma-bosqich rivojlantiriladi. Bu vaqt masalasi. Prezident tomonidan oldimizga shunday vazifa qo‘yilgan. Biz avvalgi hokimiyatning “puling yo‘q bo‘lsa, o‘z ishing” tamoyilidan voz kechdik. Bu bizning shiorimiz emas, deya ta’kidladi Baysalov.
Qirg‘izistonda shikoforlar qancha oylik oladi?
Mamlakatda shifokorlarning o‘rtacha maoshi 22-23 ming somni (taxminan 252 - 236 dollar) tashkil etadi. Bu haqda Sog‘liqni saqlash vaziri Erkin Checheybayev iyun oyida ma’lum qilgandi. U insultdan keyingi og‘ir bemorlar davolanadigan Milliy gospitalning nevrologiya bo‘limini misol qilib keltirgan.
40 yillik tajribaga ega bir shifokor 23 ming som (263 dollar) maosh olayotganini aytdi. Haqiqiy vaziyat shunday. Mamlakat bo‘ylab bir-ikki shifokor 100 ming somdan (1100 dollar) ortiq maosh oladi, ular deyarli kasalxonada yashaydi — doimiy navbatchilik va yuqori yuklama, degan vazir.
Izoh (0)