Fransiyaning Lion shahrida afg‘oncha libos kiygan, qurollangan shaxs qo‘lga olindi. Bu haqda “Interfaks” xabar qilgan.
“Gumonlanuvchining 30 santimetrli pichog‘i bor edi va u hujumga shaylangan bo‘lishi mumkin”, – degan Lion ikkinchi okrugi meri Pyer Olivye.
Qayd etilishicha, ayni vaqtda gumondor so‘roq qilinmoqda va surishtiruvlardan keyin tibbiy psixiatrik tekshiruvlarga yuboriladi.
Avval Fransiyaning Nitssa shahrida pichoq ko‘targan erkak Notr-Dam bazilikasi mehmonlariga hujum qilgan va uch kishini pichoqlab o‘ldirgani, Avinyon kommunasida pichoq ko‘targan erkak politsiyachilarga hujum uyushtirgani, oqibatda huquq-tartibot idoralarining xodimlari uni otib tashlagani haqida xabarlar berilgan. Keyinchalik Nitssada terakt sodir etgan shaxs Tunis fuqarosi – 21 yoshli Brahim A. ekanligi va uning sheriklarsiz harakat qilgani ma’lum bo‘lgan.
Eslatib o‘tamiz, Fransiyada tarix fani o‘qituvchisi o‘quvchilarga Charlie Hebdo nashri tomonidan chop etilgan Payg‘ambar Muhammad (s.a.v.)ning karikatura suratini ko‘rsatgan. Shundan so‘ng o‘qituvchi chechenistonlik muhojir tomonidan o‘ldirilgan. Bu voqea Fransiyada keng jamoatchilikning muhokamasiga sabab bo‘ldi. O‘ldirilgan o‘qituvchi bilan vidolashish marosimida Fransiya prezidenti Emmanuel Makron mamlakat so‘z erkinligidan, jumladan, karikatura borasidagi erkinlikdan voz kechmasligini ma’lum qilgan. Fransiya prezidentining mazkur bayonoti ortidan Yaqin Sharqdagi ba’zi mamlakatlarda Fransiyada ishlab chiqarilgan mahsulotlarni boykot qilish boshlandi.
2019-yilning oktabr oyida pichoq bilan qurollangan shaxs mamlakat poytaxti Parijdagi markaziy politsiya idorasida to‘rt nafar politsiya zobitini pichoqlab o‘ldirgan, keyinchalik qotilning boshqalarga xavf soladigan xulq-atvor egasi bo‘lmaganligi, kar-soqov bo‘lgani, mudhish voqeaga xodimlar o‘rtasida nizo chiqishi sabab ekani taxmin qilingandi. Voqeadan keyin Fransiya Respublikachilar fraksiyasi rahbari Kristian Yakob Parijdagi politsiya shtab-kvartirasida yuz bergan 4 nafar politsiyachining o‘ldirilishi sabab parlamentda bu ish bo‘yicha tergov komissiyasini tuzishni taklif etib, o‘sha vaqtdagi Fransiya ichki ishlar vaziri Kristof Kastanerning iste’fosini talab qilgan.
2020-yil yanvar oyida esa Parij yaqinidagi Viljyuif shaharchasida pichoq bilan qurollangan kishi yo‘lovchilarga hujum uyushtirgan, qurolli hujum Ot-Bryuyer parkida amalga oshirilgandi. Hujum oqibatida to‘rt nafar odam jarohatlangan, ulardan biri voqea joyida halok bo‘lgan. Hujum uyushtirgan qotil voqea joyiga yetib kelgan politsiyachilar tomonidan otib o‘ldirilgan. Keyinchalik, erkakning ismi Natan ekani va uning ruhiy kasallikka chalingan bemor bo‘lgani taxmin qilingandi.
Izoh (0)