Паркентдаги «кичкина Сардоба» юз берган ҳудудга маҳаллий маъмурият томонидан ёрдам кўрсатилиши маълум қилинди

2020 йилнинг 20 октябрь куни Паркент тумани «Авиасозлар» боғдорчилик-узумчилик ширкати ҳудудидаги аҳолини ичимлик суви билан таъминлайдиган сув йиғиш резервуарининг ёрилиши оқибатида сув тошқини содир бўлганди. Тошкент вилояти ҳокимлиги ахборот хизмати Паркентдаги ҳодиса юзасидан маълумотларни эълон қилди.

Қайд этилишича, ширкат 629 та дала ҳовлига хизмат кўрсатади. Ширкат ҳудудидаги 1977 йилда қурилган сув йиғиш резервуари (2000 метр куб сиғимга эга) кўп йиллардан бери фойдаланилганлиги боис таъмирталаб ҳолатга келган, авария ҳолати темир конструкцияларининг мустаҳкамлик даражаси йўқолганлиги туфайли рўй берган.

Оқибатда 17 та дала ҳовлига сув кирган. Хусусан, резервуар яқинида жойлашган 7 та дала ҳовлига жиддий зарар етган.

Жумладан, тошқин Раҳматуллаева Гулнора, Мирзева Ирина, Доброенка Кира, Широнова Евгения, Махсумов Довудхон, Абдуллаева Марҳамат ва Ашурова Bumайрамга тегишли дала ҳовлиларнинг асосий биноларига жиддий зиён келтирган. Уйнинг яшаш хоналари, ошхона, ҳаммом, ҳожатхона ва бостирмаси тиклаб бўлмайдиган даражага келган.

«Бугунги кунда Паркент тумани ҳокимлиги томонидан тезкор чоралар кўрилмоқда. Ширкат раҳбари Улуғбек Абдуллаев томонидан зарар кўрган 7 та дала ҳовлини тиклаш ишларига киришилган.

Паркент тумани ҳокимлиги ташаббуси билан аҳолига амалий ёрдам кўрсатиш мақсадида туман маҳалла ва оилани қўллаб-қувватлаш бўлими, корхона ва ташкилотлар раҳбарларидан иборат комиссия тузилди.

Комиссияга туман ҳокимининг биринчи ўринбосари, молия бўлими, туман бош меъмори, ер ресурслари ва кўчмас мулк кадастри, бандликка кўмаклашиш маркази, уй-жой коммунал хизмат кўрсатиш бўлими мутасаддилари кирган бўлиб, улар ширкат раҳбари ва ширкат аъзолари билан кўрилган зарар миқдорини аниқлашади. Албатта, зарар кўрган дала ҳовлиларнинг бино ва иншоотларини таъмирлаш чоралари кўрилади», – дейилади хабарда.

Ҳокимлик хабарига кўра, туман электр тармоқлари, газ таъминоти, «Сувоқова» филиали корхоналари томонидан соҳалар бўйича таъминот тизимларининг ҳолати ўрганилиб, зарар кўрган дала ҳовлиларда коммунал тармоқларни тиклаш-таъмирлаш ишларга киришилган.

Шунингдек, туман санитария-эпидемиологик осойишталик маркази, маҳалла ва оилани қўллаб-қувватлаш бўлими ходимлари томонидан аҳоли орасида турли хил касалликлар келиб чиқмаслиги учун профилактик тадбирлар олиб борилмоқда.

Эслатиб ўтамиз, Фавқулодда вазиятлар вазирлиги 20 октябрь куни Тошкент вилояти Паркент тумани «Авиасозлар» боғдорчилик-узумчилик ширкати (БУШ)да сиғими 2 минг метр куб бўлган цистерна ёрилганини маълум қилган. Кейинчалик ФВВ матбуот хизмати Паркент туманида юз берган ҳодиса фавқулодда вазият ҳисобланиши, цистерна ёрилиши оқибатларини бартараф этишга вазирлик куч ва воситалари жалб этилгани, сув ҳайдаб чиқарилгани, ҳудудлар чиқиндидан тозалангани, шунингдек, қайта тиклаш ишлари амалга оширилаётганини билдирганди.