O‘zbekiston yalpi ichki mahsulotining (YaIM) 2020-yilning yanvar–sentabr oylarida hajmi joriy narxlarda 408,2 trillion so‘mni tashkil etdi va 2019-yilning yanvar–sentabri bilan taqqoslaganda 0,4 foizga o‘sdi. Bu haqda Davlat statistika qo‘mitasi ma’lum qildi.
YaIM deflyator indeksi 2019-yilning yanvar–sentyabridagi narxlarga nisbatan 11,8 foizni tashkil etdi.
Qayd etilishicha, 2020-yilning yanvar–sentabr oylari yakuniga ko‘ra, YaIM tarkibida tovarlar ishlab chiqarishda 240,3 trillion so‘m, xizmatlar ko‘rsatish sohasida 136,4 trillion so‘m miqdorida yalpi qo‘shilgan qiymat yaratildi, mahsulotlarga sof soliqlar esa 31,5 trillion so‘mni tashkil etdi.
Shuningdek, 2020-yilning yanvar–sentabr oylarida YaIM o‘sishi 2019-yilning yanvar–sentabridagi 5,9 foiz va 2018–yilning yanvar–sentabridagi 5,7 foizga nisbatan 0,4 foizgacha sekinlashdi.
Shu bilan birga, YaIM deflyator indeksida ham 2019-yil yanvar–sentabridagi 18,5 foiz va 2018-yilning yanvar–sentabridagi 30,5 foizga nisbatan 2020-yilning yanvar–sentabr oylarida 11,8 foizgacha sekinlashish kuzatildi.
Kuzatilayotgan davrda o‘rtacha almashuv kursi bo‘yicha hisoblangan nominal YaIM hajmi 41 072,2 million AQSh dollarini tashkil etdi (2019-yilning yanvar–sentabrida 42 220,1 million AQSh dollari).
Aholi jon boshiga hisoblangan YaIM 11,9 million so‘mni yoki 1 203 AQSh dollarini tashkil etdi.
Avvalroq O‘zbekiston 2021-yilda iqtisodiy o‘sishni 5,1 foizga yetkazishni ko‘zlanayotgani xabar qilingandi.
Mavzuga doir:
- Pandemiya oqibatida yuzaga kelgan inqiroz O‘zbekistonda 20 yildan ko‘proq vaqt ichida birinchi marta kambag‘allik darajasini oshirdi — Jahon banki
- Yevropa tiklanish va taraqqiyot banki O‘zbekistonning YaIM bo‘yicha 2021-yil prognozini pasaytirdi
- Osiyo taraqqiyot banki 2020-yilda O‘zbekistonda iqtisodiy o‘sish 0,5 foizgacha pasayishini prognoz qildi
Izoh (0)