Ўзбекистон ялпи ички маҳсулотининг (ЯИМ) 2020 йилнинг январь–сентябрь ойларида ҳажми жорий нархларда 408,2 триллион сўмни ташкил этди ва 2019 йилнинг январь–сентябри билан таққослаганда 0,4 фоизга ўсди. Бу ҳақда Давлат статистика қўмитаси маълум қилди.
ЯИМ дефлятор индекси 2019 йилнинг январь–сентябридаги нархларга нисбатан 11,8 фоизни ташкил этди.
Қайд этилишича, 2020 йилнинг январь–сентябрь ойлари якунига кўра, ЯИМ таркибида товарлар ишлаб чиқаришда 240,3 триллион сўм, хизматлар кўрсатиш соҳасида 136,4 триллион сўм миқдорида ялпи қўшилган қиймат яратилди, маҳсулотларга соф солиқлар эса 31,5 триллион сўмни ташкил этди.
Шунингдек, 2020 йилнинг январь–сентябрь ойларида ЯИМ ўсиши 2019 йилнинг январь–сентябридаги 5,9 фоиз ва 2018–йилнинг январь–сентябридаги 5,7 фоизга нисбатан 0,4 фоизгача секинлашди.
Шу билан бирга, ЯИМ дефлятор индексида ҳам 2019 йил январь–сентябридаги 18,5 фоиз ва 2018 йилнинг январь–сентябридаги 30,5 фоизга нисбатан 2020 йилнинг январь–сентябрь ойларида 11,8 фоизгача секинлашиш кузатилди.
Кузатилаётган даврда ўртача алмашув курси бўйича ҳисобланган номинал ЯИМ ҳажми 41 072,2 миллион АҚШ долларини ташкил этди (2019 йилнинг январь–сентябрида 42 220,1 миллион АҚШ доллари).
Аҳоли жон бошига ҳисобланган ЯИМ 11,9 миллион сўмни ёки 1 203 АҚШ долларини ташкил этди.
Аввалроқ Ўзбекистон 2021 йилда иқтисодий ўсишни 5,1 фоизга етказишни кўзланаётгани хабар қилинганди.
Мавзуга доир:
- Пандемия оқибатида юзага келган инқироз Ўзбекистонда 20 йилдан кўпроқ вақт ичида биринчи марта камбағаллик даражасини оширди — Жаҳон банки
- Европа тикланиш ва тараққиёт банки Ўзбекистоннинг ЯИМ бўйича 2021 йил прогнозини пасайтирди
- Осиё тараққиёт банки 2020 йилда Ўзбекистонда иқтисодий ўсиш 0,5 фоизгача пасайишини прогноз қилди
Изоҳ (0)