Vazirlar Mahkamasining 26-oktabrdagi “O‘zbekiston Respublikasi Prezidenti administratsiyasining Davlat rezidensiyalariga xizmat ko‘rsatish va tadbirlarini tashkillashtirish boshqarmasi ‘Ko‘ksaroy qarorgohi’ davlat muassasasining hududini obodonlashtirish ishlarini tashkil etish va amalga oshirish tizimini takomillashtirish to‘g‘risida"gi qarori qabul qilindi, deya xabar berdi “Gazeta.uz”.
Hujjatga ko‘ra, Toshkent shahar hokimligining yuridik shaxs tashkil etmasdan, “Ko‘ksaroy qarorgohi” davlat muassasasi hududini obodonlashtirish direksiyasini tuzish to‘g‘risidagi taklifi qabul qilindi.
Direksiya direktori bir vaqtning o‘zida Toshkent shahar hokimligi huzuridagi Obodonlashtirish bosh boshqarmasining hukumat obyektlariga xizmat ko‘rsatish ixtisoslashtirilgan boshqarmasi boshlig‘i o‘rinbosari etib belgilandi. Uning boshqaruv xodimlari cheklangan soni 4 nafardan (direktori, bosh agronom, muhandis, uchastka boshlig‘i) iborat bo‘ladi.
Bundan tashqari, qaror bilan direksiya uchun suv sepish hamda “PM-8” rusumli suv sepish va qor kurash mashinasi, ag‘darma mashina, Damas-2, TTZ traktori, traktor tirkamasi, 100 litrli va orqada ko‘tarib yuriladigan purkagich, 20 ta gazon o‘rish texnikasi va 20 ta trimmer xarid qilishga 2 milliard 35 million 313 ming so‘m ajratiladi.
Oylik maosh hamda texnik bazani yaxshilash bo‘yicha sarflanadigan xarajatlar 2020-yilda Toshkent shahar mahalliy budjetiga prognozdan ortiqcha tushgan daromadlar hamda iqtisod qilingan mablag‘lar hisobidan qoplanadi. 2021-yildan esa mablag‘lar respublika davlat budjeti parametrlari doirasida ajratiladi.
Ishchi xodimlar soni tuman (shahar) obodonlashtirish boshqarmalari xodimlari soni normativini belgilash yo‘riqnomasiga muvofiq, hukumat obyektlariga xizmat ko‘rsatish ixtisoslashtirilgan boshqarmasidagi mavjud bo‘lgan xodimlar soni doirasida tuziladi.
Direksiya xodimlari “Ko‘ksaroy qarorgohi”ga tutash hududdagi ma’muriy va ishlab chiqarish binolariga joylashtiriladi.
Izoh (0)