БМТнинг Бутунжаҳон туризм ташкилоти халқаро туризмнинг 2020 йил якунларига кўра 70 фоизгача қисқариши ва оптимистик сценарий бўйича 2021 йил III чорагидан эрта тикланмаслигини прогноз қилди.
«Дунёда халқаро туризм 2021 йилнинг учинчи чорагида қайта тикланиши мумкин. Бироқ экспертларнинг 20 фоизи ушбу ҳодиса 2022 йилда содир бўлишини тахмин қилмоқда», – дейилади хабарда.
Ташкилот вакилларининг фикрича, соҳанинг қайта тикланишига халақит қиладиган бир нечта омиллар мавжуд. Коронавирусни жиловлашнинг жуда секин кечаётгани, мамлакатларнинг пандемияга қарши мувофиқлаштирилган чекловлар қўлламаётгани, ёмонлашган иқтисодий вазият, шулар жумласидан.
«2020 йилнинг саккиз ойи давомида халқаро саёҳатлар сони ўтган йилнинг мос даврига нисбатан 700 миллион ёки 70 фоизга қисқарган, оқибатда соҳада 730 миллиард АҚШ доллари миқдорида маблағ йўқотилган. Бу 2009 йилдаги жаҳон молиявий-иқтисодий инқирози пайтида етган зарардан саккиз бараварга кўп», – дейилади UNWTO ҳисоботида.
Июль ойида халқаро саёҳатлар сони 81 фоизга, августда эса 79 фоизга тушиб кетган. Одатда ушбу икки ой йил давомидаги юклама ҳажми энг кўп мавсум ҳисобланади.
Туристик оқимнинг камайиши бутун дунёда кузатилган. Осиё-Тинч океани минтақаси COVID-19 пандемиясидан энг кўп зарар кўрган, ташрифлар сони 79 фоизга тушиб қолган. Кейинги ўринларда Африка ва Яқин Шарқ (икковида ҳам -69 фоиз), Европа (-68 фоиз) ҳамда Америка (-65 фоиз) жойлашган.
«Европада чегараларнинг эҳтиёткорлик билан очилиши натижасида соҳадаги пастлаш нисбатан сусайган (июлда -72 фоиз ва августда -69фоиз). Аммо тикланиш узоқ давом этмади, касалланишлар сонининг ошиши оқибатида яна чекловлар жорий қилинган», – дея қайд этган UNWTO.
Мавзуга доир: Европа Иттифоқида туризм сектори пандемия сабаб даромадларининг чорак қисминигина сақлаб қолгани маълум бўлди
«Саёҳатларга бўлган талаб пандемия туфайли юзага келган ноаниқликлар сабаб камайган. 2020 йил давомидаги пасайиш 70 фоизни ташкил қилиши тахмин қилинмоқда», дейилади ташкилот баёнотида.
2020 йил июнь ойида Жаҳон туризм ташкилоти карантиндан кейин туризм бутун дунёда қайта тиклана бошлаганини маълум қилганди.
Изоҳ (0)