Kolumbiya koronavirus yuqtirib olganlar soni 1 milliondan oshgan dunyodagi 8-davlatga aylandi

Kolumbiyada koronavirusga chalingan fuqarolar soni 1 025 052 nafarga (Toshkent vaqti bilan 2020-yil 28-oktabr soat 00:15 holatiga ko‘ra) yetdi. Bu haqdagi Jons Hopkins universiteti taqdim etib borayotgan statistik ma’lumotlarda xabar qilingan.

Kolumbiyada 30 348 kishi COVID-19 koronavirus infeksiyasi asoratlari oqibatida vafot etgan. Mamlakat butun dunyoda koronavirusga chalingan fuqarolari soni 1 million nafardan oshgan 8-, Janubiy Amerikadagi hududlar orasida esa 3-davlatga aylandi. Undan avval AQSh, Hindiston, Braziliya, Rossiya, Fransiya, Ispaniya va Argentina kabi davlatlarda koronavirus bilan kasallanganlar soni 1 million nafardan oshgandi.

AQShda koronavirus yuqtirib olganlar soni 8,7 milliondan, Hindistonda 7,9 milliondan va Braziliyada 5,4 milliondan oshib ketgan. Dunyo bo‘yicha COVID-19’ga chalinganlar soni 2020-yil 28-oktabr Toshkent vaqti bilan soat 00:15 holatiga ko‘ra 43 787 411 nafarni tashkil qilmoqda, pandemiya boshlanganidan buyon 1 163 592 nafar bemor infeksiya asoratlari oqibatida vafot etgan.

Ma’lumot uchun, dunyoda koronavirusga chalinganlar soni 5-oktabr kuni 35 milliondan, 11-oktabr kuni 37 million, 14-oktabr kuni 38 million, 19-oktabr kuni 40 million, 22-oktabr kuni  41 million, 24-oktabr kuni 42 million, 26-oktabrda esa 43 million kishidan oshgan.