Pandemiya tufayli 28-oktabrdan Abxaziyada qolib ketgan O‘zbekiston fuqarolarini qaytarish boshlanadi. Bu haqda O‘zbekistonning Rostov-Dondagi bosh konsuli Rustam Kurganbayevga tayanib, “Kun.uz” xabar qilmoqda.
Rossiya orqali Abxaziyaga ishlashga borgan, pandemiya tufayli ushbu hududda qolib ketgan o‘zbekistonliklar Tashqi ishlar vazirligining bayonotiga ishonib, 15-oktabrdan boshlab Abxaziya–Rossiya chegarasida to‘plana boshlagan, ularning yuzga yaqini ortga qaytishni istamay, chegara-nazorat punkti atrofida tunayotgan edi.
Tashqi ishlar vazirligining 30-sentabr kungi bayonotida 400 ga yaqin o‘zbekistonliklarning birinchi guruhi oktabr boshida vatanga qaytarilishi aytilgandi. O‘zbekistonning Rostov-Dondagi bosh konsulligi bosh konsuli Rustam Kurganbayev ushbu jarayonning cho‘zilib ketganini charter reyslar bilan olib kelinadiganlar ro‘yxatini tuzishga ko‘p vaqt ketib qolgani, qolaversa, Rossiya Maxsus komissiyasidan O‘zbekiston fuqarolarining Sochi orqali olib chiqib ketilishiga ruxsat olish kechikkani bilan izohlagandi.
Rustam Kurganbayevning xabar berishicha, 23-oktabr kuni Moskvada Rossiya hukumati raisi o‘rinbosari Tatyana Golikova rahbarligida bo‘lib o‘tgan Maxsus komissiyaning navbatdagi yig‘ilishida Abxaziyada qolib ketgan o‘zbekistonliklarni Rossiya orqali O‘zbekistonga qaytarishga ruxsat berilgan.
“26-oktabr kuni ertalab fuqarolarimizning Abxaziya chegarasidan Rossiya hududiga o‘tishlariga va shu yerdan O‘zbekistonga charter reys bilan uchib ketishlariga ruxsat berilgani haqida Moskvadan xabar oldik. Bu xabarni o‘sha zahoti biz bilan aloqada bo‘lib turgan insonlar orqali Abxaziyadagi vatandoshlarimizga yetkazdim.
Uzbekistan Airways kompaniyasining ikkita samolyoti 28-oktabr kuni yetib keladi. Shu kunning o‘zida 300 kishini O‘zbekistonga olib ketadi. O‘zim ham Sochi shahriga uchib ketyapman. Abxaziya–Rossiya chegarasiga yetib borib, fuqarolarimizni chegaradan olib o‘tish va samolyotlarga yetkazib qo‘yish ishlariga shaxsan bosh-qosh bo‘laman. O‘zbekistonliklar chegaradan to aeroportgacha bepul avtobuslarda yetkazib qo‘yiladi”, – deydi Rustam Kurganbayev.
Ayni paytda Abxaziya–Rossiya chegarasida turgan surxondaryolik Rinat Yusupov nashr bilan suhbatda bosh konsulning so‘zlarini tasdiqladi. Uning aytishicha, Abxaziyadagi vatandoshlar O‘zbekistonga uchta samolyotda olib ketilishi rejalashtirilmoqda.
“Bosh konsulxona tomonidan Maxsus komissiyaga taqdim etilgan ro‘yxatga kiritilgan o‘zbekistonliklarning 1 va 2-guruhlari 28-oktabr kuni uchib ketishi kutilmoqda. Ikkita samolyotda jami 290 kishi ucharkan. Hammasi ekonom klass. Aviachipta narxi qancha bo‘lishini hozircha bilmaymiz, 30 ming rubl atrofida bo‘lishi aytilgan. Aviachiptani aeroport kassasidan, samolyotga chiqishimizdan oldinroq sotib olar ekanmiz.
Uchinchi samolyot 30-oktabr kuniga qo‘yilarkan. Unda ro‘yxatga kiritilgan fuqarolarning uchinchi guruhi olib ketiladi. Ro‘yxatga kirmaganlar qachon, qay tarzda olib ketilishini bilmayman, buni bosh konsulxonadagilardan so‘ragan ma’qul. Yurtdoshlarimiz shuncha vaqtdan berib qotib qolgan ishlar siljiganidan, yurtga qaytish jarayoni boshlanganidan juda xursand”, – deydi Rinat Yusupov.
Eslatib o‘tamiz, O‘zbekistonning Rostov-Dondagi bosh konsulligi rahbari Rustam Kurganbayev avvalroq nashrga bergan intervyusida ro‘yxatga kiritilgan barcha erkak-ayollar Abxaziyadan olib chiqib ketilishi, hech kim tashlab qo‘yilmasligini ta’kidlagan, ro‘yxatga kirmagan, hozircha Abxaziyada qolayotgan o‘zbekistonliklarni ham vatanga qaytarish choralarini ko‘rilishini aytgan edi.
Bosh konsul, shuningdek, Astraxanda 500, Janubiy Osetiyada 100 nafar O‘zbekiston fuqarosi qolib ketgani, ayni paytda ularni vatanga qaytarish uchun ro‘yxat shakllantirilayotganini ma’lum qilgandi.
Yusupovning qo‘shimcha qilishicha, Abxaziya–Rossiya chegara-nazorat punkti atrofida tunab yurgan, vatanga qaytishni kutayotgan ikki nafar o‘zbekistonlik vafot etgan. 22-oktabr kuni qazo qilgan samarqandlik ayol oila a’zolarining xohishiga ko‘ra shu yerga dafn etilgan bo‘lsa, 25-oktabr kuni olamdan o‘tgan surxondaryolik 33 yashar yigitning jasadi Tashqi mehnat migratsiyasi agentligi yordamida O‘zbekistonga olib kelinishi kutilmoqda.
Rustam Kurganbayevning aytishicha, bu boradagi barcha xarajatlar Xorijda mehnat faoliyatini amalga oshiruvchi shaxslarni qo‘llab-quvvatlash hamda ularning huquq va manfaatlarini himoya qilish jamg‘armasi mablag‘lari hisobidan qoplab beriladi.
Izoh (0)