Пандемия туфайли 28 октябрдан Абхазияда қолиб кетган Ўзбекистон фуқароларини қайтариш бошланади. Бу ҳақда Ўзбекистоннинг Ростов-Дондаги бош консули Рустам Курганбаевга таяниб, «Kun.uz» хабар қилмоқда.
Россия орқали Абхазияга ишлашга борган, пандемия туфайли ушбу ҳудудда қолиб кетган ўзбекистонликлар Ташқи ишлар вазирлигининг баёнотига ишониб, 15 октябрдан бошлаб Абхазия–Россия чегарасида тўплана бошлаган, уларнинг юзга яқини ортга қайтишни истамай, чегара-назорат пункти атрофида тунаётган эди.
Ташқи ишлар вазирлигининг 30 сентябрь кунги баёнотида 400 га яқин ўзбекистонликларнинг биринчи гуруҳи октябрь бошида ватанга қайтарилиши айтилганди. Ўзбекистоннинг Ростов-Дондаги бош консуллиги бош консули Рустам Курганбаев ушбу жараённинг чўзилиб кетганини чартер рейслар билан олиб келинадиганлар рўйхатини тузишга кўп вақт кетиб қолгани, қолаверса, Россия Махсус комиссиясидан Ўзбекистон фуқароларининг Сочи орқали олиб чиқиб кетилишига рухсат олиш кечиккани билан изоҳлаганди.
Рустам Курганбаевнинг хабар беришича, 23 октябрь куни Москвада Россия ҳукумати раиси ўринбосари Татяна Голикова раҳбарлигида бўлиб ўтган Махсус комиссиянинг навбатдаги йиғилишида Абхазияда қолиб кетган ўзбекистонликларни Россия орқали Ўзбекистонга қайтаришга рухсат берилган.
«26 октябрь куни эрталаб фуқароларимизнинг Абхазия чегарасидан Россия ҳудудига ўтишларига ва шу ердан Ўзбекистонга чартер рейс билан учиб кетишларига рухсат берилгани ҳақида Москвадан хабар олдик. Бу хабарни ўша заҳоти биз билан алоқада бўлиб турган инсонлар орқали Абхазиядаги ватандошларимизга етказдим.
Uzbekistan Airways компаниясининг иккита самолёти 28 октябрь куни етиб келади. Шу куннинг ўзида 300 кишини Ўзбекистонга олиб кетади. Ўзим ҳам Сочи шаҳрига учиб кетяпман. Абхазия–Россия чегарасига етиб бориб, фуқароларимизни чегарадан олиб ўтиш ва самолётларга етказиб қўйиш ишларига шахсан бош-қош бўламан. Ўзбекистонликлар чегарадан то аэропортгача бепул автобусларда етказиб қўйилади», – дейди Рустам Курганбаев.
Айни пайтда Абхазия–Россия чегарасида турган сурхондарёлик Ринат Юсупов нашр билан суҳбатда бош консулнинг сўзларини тасдиқлади. Унинг айтишича, Абхазиядаги ватандошлар Ўзбекистонга учта самолётда олиб кетилиши режалаштирилмоқда.
«Бош консулхона томонидан Махсус комиссияга тақдим этилган рўйхатга киритилган ўзбекистонликларнинг 1 ва 2-гуруҳлари 28 октябрь куни учиб кетиши кутилмоқда. Иккита самолётда жами 290 киши учаркан. Ҳаммаси эконом класс. Авиачипта нархи қанча бўлишини ҳозирча билмаймиз, 30 минг рубль атрофида бўлиши айтилган. Авиачиптани аэропорт кассасидан, самолётга чиқишимиздан олдинроқ сотиб олар эканмиз.
Учинчи самолёт 30 октябрь кунига қўйиларкан. Унда рўйхатга киритилган фуқароларнинг учинчи гуруҳи олиб кетилади. Рўйхатга кирмаганлар қачон, қай тарзда олиб кетилишини билмайман, буни бош консулхонадагилардан сўраган маъқул. Юртдошларимиз шунча вақтдан бериб қотиб қолган ишлар силжиганидан, юртга қайтиш жараёни бошланганидан жуда хурсанд», – дейди Ринат Юсупов.
Эслатиб ўтамиз, Ўзбекистоннинг Ростов-Дондаги бош консуллиги раҳбари Рустам Курганбаев аввалроқ нашрга берган интервьюсида рўйхатга киритилган барча эркак-аёллар Абхазиядан олиб чиқиб кетилиши, ҳеч ким ташлаб қўйилмаслигини таъкидлаган, рўйхатга кирмаган, ҳозирча Абхазияда қолаётган ўзбекистонликларни ҳам ватанга қайтариш чораларини кўрилишини айтган эди.
Бош консул, шунингдек, Астраханда 500, Жанубий Осетияда 100 нафар Ўзбекистон фуқароси қолиб кетгани, айни пайтда уларни ватанга қайтариш учун рўйхат шакллантирилаётганини маълум қилганди.
Юсуповнинг қўшимча қилишича, Абхазия–Россия чегара-назорат пункти атрофида тунаб юрган, ватанга қайтишни кутаётган икки нафар ўзбекистонлик вафот этган. 22 октябрь куни қазо қилган самарқандлик аёл оила аъзоларининг хоҳишига кўра шу ерга дафн этилган бўлса, 25 октябрь куни оламдан ўтган сурхондарёлик 33 яшар йигитнинг жасади Ташқи меҳнат миграцияси агентлиги ёрдамида Ўзбекистонга олиб келиниши кутилмоқда.
Рустам Курганбаевнинг айтишича, бу борадаги барча харажатлар Хорижда меҳнат фаолиятини амалга оширувчи шахсларни қўллаб-қувватлаш ҳамда уларнинг ҳуқуқ ва манфаатларини ҳимоя қилиш жамғармаси маблағлари ҳисобидан қоплаб берилади.
Изоҳ (0)