Bokudagi AQSh elchixonasi Ozarbayjon poytaxtida terrorchilik hujumlari uyushtirilishi hamda AQSh fuqarolari va chet elliklar o‘g‘irlab ketilishi mumkinligi haqida ishonchli ma’lumotni qo‘lga kiritdi. Bu haqda diplomatik missiya saytida xabar berildi, deb yozadi “RBK”.
Teraktlar shahardagi mehmonxonalarda yoki “Bokuning boshqa joylarida” amalga oshirilishi mumkin. AQSh fuqarolariga chet elliklar to‘plangan joylarda juda ehtiyot bo‘lish maslahat berildi.
Shuningdek, AQSh fuqarolariga olomonga yaqinlashmaslik, ogoh bo‘lish va ortiqcha e’tibor tortmaslik tavsiya qilindi.
AQSh elchixonasining bayonoti Tog‘li Qorabog‘da Ozarbayjon va Armanistonning qurolli to‘qnashuvlari davom etayotgan bir paytda yangradi. 24-oktabr kuni Boku Armaniston HHK samolyoti urib tushirilgani va uchuvchisiz qurilma yo‘q qilinganini ma’lum qilgandi.
Avvalroq Armaniston bosh vaziri Nikol Pashinyan Armaniston tinchlikparvarlarning, xususan, ular rossiyalik bo‘lsa ham, Qorabog‘ nizosiga aralashuviga qarshi emasligini aytgan edi.
Eslatib o‘tamiz, Tog‘li Qorabog‘dagi harbiy harakatlar tinchlikka erishish uchun qilingan ikkita urinishga qaramasdan, 27-sentabrdan buyon davom etmoqda. Ozarbayjon va Armaniston 10-oktabr kuni soat 12:00 dan boshlab Tog‘li Qorabog‘da o‘t ochishni to‘xtatish to‘g‘risida kelishib olgandi. Ammo shu kuni keyinroq Armaniston va Ozarbayjon Mudofaa vazirliklari bir-birini Tog‘li Qorabog‘da o‘t ochishni to‘xtatish rejimini buzishda aybladi.
19-oktabrda Armaniston bosh vaziri Nikol Pashinyan va Ozarbayjon prezidenti Ilhom Aliyev Tog‘li Qorabog‘dagi mojaro bo‘yicha muzokaralar o‘tkazishga tayyorligini ma’lum qilgan. Keyinroq Pashinyan Tog‘li Qorabog‘da Rossiya uchun bevosita xavf soluvchi Suriya terrorchilik guruhlari jangarilari bo‘lganligi uchun Moskva u yerda aksilterrorchilik operatsiyalarini o‘tkazish uchun asosga ega ekanligini aytgan.
Turkiya esa Boku iltimos qilsa, “ikkilanmasdan” Ozarbayjonga askarlarini jo‘natishi va harbiy ko‘mak berishini ma’lum qildi.
Izoh (0)