Janubiy Koreya OAVlari KXDR yetakchisi Kim Chen Inning rafiqasi Ri Sol Chju haqida hech qanday yangilik yo‘qligiga e’tibor qaratdi. Ri Sol Chju Shimoliy Koreya rasmiy yangiliklarida so‘nggi marta 2020-yilning 25-yanvarida ko‘ringan. Uning ko‘rinmayotganiga turli sabablar, jumladan, homiladorlik ko‘rsatilmoqda. Bu haqda “RIA Novosti” xabar berdi.
Kim Chen In 2019-yilning dekabr oyida oq otda Shimoliy Koreya fuqarolari uchun muqaddas bo‘lgan Pektusan tog‘iga tashrif buyurgan, KXDR yetakchisiga uning yaqin maslahatchilari va rafiqasi hamrohlik qilgan. 25-yanvarda Ri Sol Chju Oy taqvimi bo‘yicha Yangi yil munosabati bilan “Samchjiyon” musiqali teatri spektaklida eriga hamrohlik qilgan.
Shundan buyon Shimoliy Koreya yetakchisi bir necha marta yirik tadbirlarda qatnashdi. 10-oktabrda Koreya Ishchilar partiyasiga asos solinganining 75 yilligi sharafiga harbiy parad tashkil qilindi, keyin esa gimnastikachilarning keng qamrovli bayramona chiqishi bo‘lib o‘tdi. Biroq bu tadbirlarning hech birida Ri Sol Chju ishtirok etmagan.
Yonhap agentligining xabar berishicha, Janubiy Koreyaning birlashish vaziri Li In Yon xulosa qilishga shoshilmaslikka chaqirgan hamda avvalroq OAVlar Kim Chen Inning “yo’qolib qolgan” singlisi Kim Yo Chjonni izlaganini, u esa ikki oydan keyin omma oldida paydo bo‘lganini eslatib o‘tgan.
“Xalq kuchi” partiyasi deputati Chon Chjin Sonning qayd etishicha, mish-mishlarga ko‘ra, Ri Sol Chju davolanayotgan xolasiga qaramoqda yoki vaqtini bolalarni o‘qitishga qaratmoqda. Kim Chen Inning rafiqasi yo‘qolib qolishiga sabab sifatida koronavirus tarqalgani sababli ko‘rilgan ehtiyotkorlik ham ko‘rsatilmoqda.
Kim Chen Inning bolalari borligi va ularning nechtaligi haqida aniq ma’lumot yo‘q. Turli manbalar KXDR yetakchisining ikki, uch va hatto to‘rt nafar farzandi borligi haqida gapiradi. Ri Sol Chjuning homiladorligi haqida so‘nggi yillarda bir necha marta mish-mishlar tarqalgan, bunga uning bir muddat televizor ekranlari va gazeta sahifalaridan yo‘qolib qolgani sabab bo‘lgan.
Manbalardan biriga ko‘ra, dastlabki ikki farzand 2010 va 2013-yilda tug‘ilgan qizlar ekanligi taxmin qilinadi. Boshqa manbalar esa Ri Sol Chjuning birinchi qizi 2012-yilning dekabr oyida tug‘ilganini ta’kidlaydi. KXDR birinchi xonimining ikkinchi marta homilador bo‘lganligi haqida 2014-yilda xabarlar tarqalgan. 2019-yilda Janubiy Koreya OAVlari razvedka manbasiga tayanib, Kim Chen Inning uchinchi farzandi tug‘ilgani haqida xabar bergan, biroq bolaning jinsiga aniqlik kiritilmagan.
Izoh (0)