Бокудаги АҚШ элчихонаси Озарбайжон пойтахтида террорчилик ҳужумлари уюштирилиши ҳамда АҚШ фуқаролари ва чет элликлар ўғирлаб кетилиши мумкинлиги ҳақида ишончли маълумотни қўлга киритди. Бу ҳақда дипломатик миссия сайтида хабар берилди, деб ёзади «РБК».
Терактлар шаҳардаги меҳмонхоналарда ёки «Бокунинг бошқа жойларида» амалга оширилиши мумкин. АҚШ фуқароларига чет элликлар тўпланган жойларда жуда эҳтиёт бўлиш маслаҳат берилди.
Шунингдек, АҚШ фуқароларига оломонга яқинлашмаслик, огоҳ бўлиш ва ортиқча эътибор тортмаслик тавсия қилинди.
АҚШ элчихонасининг баёноти Тоғли Қорабоғда Озарбайжон ва Арманистоннинг қуролли тўқнашувлари давом этаётган бир пайтда янгради. 24 октябрь куни Боку Арманистон HHK самолёти уриб туширилгани ва учувчисиз қурилма йўқ қилинганини маълум қилганди.
Аввалроқ Арманистон бош вазири Никол Пашинян Арманистон тинчликпарварларнинг, хусусан, улар россиялик бўлса ҳам, Қорабоғ низосига аралашувига қарши эмаслигини айтган эди.
Эслатиб ўтамиз, Тоғли Қорабоғдаги ҳарбий ҳаракатлар тинчликка эришиш учун қилинган иккита уринишга қарамасдан, 27 сентябрдан буён давом этмоқда. Озарбайжон ва Арманистон 10 октябрь куни соат 12:00 дан бошлаб Тоғли Қорабоғда ўт очишни тўхтатиш тўғрисида келишиб олганди. Аммо шу куни кейинроқ Арманистон ва Озарбайжон Мудофаа вазирликлари бир-бирини Тоғли Қорабоғда ўт очишни тўхтатиш режимини бузишда айблади.
19 октябрда Арманистон бош вазири Никол Пашинян ва Озарбайжон президенти Илҳом Алиев Тоғли Қорабоғдаги можаро бўйича музокаралар ўтказишга тайёрлигини маълум қилган. Кейинроқ Пашинян Тоғли Қорабоғда Россия учун бевосита хавф солувчи Сурия террорчилик гуруҳлари жангарилари бўлганлиги учун Москва у ерда аксилтеррорчилик операцияларини ўтказиш учун асосга эга эканлигини айтган.
Туркия эса Боку илтимос қилса, «иккиланмасдан» Озарбайжонга аскарларини жўнатиши ва ҳарбий кўмак беришини маълум қилди.
Изоҳ (0)