“Qadring baland bo‘lsin, ona tilim!”: “O‘zdonmahsulot” AKda o‘zbek tiliga bag‘ishlangan tadbir

“Milliy tilni yo‘qotmak millatning ruhini yo‘qotmakdur”, — degan edi millat ravnaqi yo‘lida jon kuydirgan bobomiz Abdulla Avloniy.

“O‘zdonmahsulot” aksiyadorlik kompaniyasida ham ona tilimizning mavqeyini oshirish, uni rivojlantirish yo‘lida salmoqli ishlar qilinmoqda. Jumladan, kompaniya va uning  tarkibidagi korxonalarda 21-oktabr — o‘zbek tili bayrami kuni munosabati bilan elimiz ardog‘idagi yozuvchi va shoirlar ishtirokida bayram tadbiri va badiiy kechalar  tashkil etildi.

Xususan, “G‘alla-Alteg” aksiyadorlik jamiyatida o‘tkazilgan tadbir ishtirokchilarda alohida taassurot qoldirdi. Tadbirda so‘zga chiqqanlar tomonidan korxona tomonidan muntazam ravishda davlat tiliga oid qonun hujjatlari targ‘iboti o‘tkazilib, ularga so‘zsiz rioya etilishini ta’minlash yuzasidan bir qator ishlar amalga oshirib kelinayotganligi alohida ta’kidlab o‘tildi.  Korxonada tashkil etilgan mutolaa xonasi kitob fondi muntazam ravishda yangilanib, so‘nggi nashrdagi “Imlo lug‘ati”, “O‘zbek tilining izohli lug‘ati” hamda “O‘zbek tilida ish yuritish” kabi qo‘llanmalardan xodimlarning muntazam ravishda va samarali foydalanishlari uchun barcha shart-sharoitlar yaratilgan.

Ta’kidlash lozimki, “O‘zdonmahsulot” AK va uning tarkibidagi korxonalarda o‘zaro hujjat almashinuv tizimi to‘liq o‘zbek tilida amalga oshirilib, o‘zbek tilining imlo va grammatika qoidalariga amal qilgan holda olib borilishi ustidan nazorat olib boriladi. Shuningdek, termin va sohaviy atamalarning o‘zbek tilidagi muqobili mavjud so‘zlarga almashtirilishi, o‘zbek tili imkoniyatlaridan keng va samarali foydalanishga alohida e’tibor qaratib kelinmoqda. Bu xususda tizimdagi korxonalarning mas’ul xodimlariga ham tegishli ko‘rsatmalar berilgan bo‘lib, kompaniya tarkibidagi korxonalarda ham ayni jihatlar ustidan nazorat olib borilmoqda.

Tadbirda ta’kidlanganidek, korxonada o‘zbek tilining nufuzini yanada oshirish, xodimlar o‘rtasida davlat tilining o‘rni va ahamiyati borasida tushintirish ishlari olib borishning samarali usullaridan foydalanish xususida amalga oshirib kelinayotgan ishlar xususida ma’lumot berildi.

Tadbirning badiiy qismida o‘zbek tilida ijod qilgan buyuk allomalarimiz, shoir va yozuvchilarimizning ijodidan o‘rin egallagan she’r va g‘azallar ijro etildi. Taklif etilgan yosh umidli yozuvchi va shoirlar tomonidan betakror ijod namunalari yig‘ilganlar e’tiboriga havola etildi.

Reklama huquqi asosida