O‘zbekiston Prezidenti davlat xavfsizlik xizmati raisi Bahodir Toshmatov Prezident huzuridagi Xavfsizlik kengashi kotibining Qurolli kuchlarni rivojlantirish masalalari bo‘yicha o‘rinbosari lavozimiga tayinlandi. Bu haqda “Gazeta.uz” o‘zining hukumatdagi manbasiga tayanib xabar berdi.
Bahodir Toshmatov shu yilning martidan Prezident davlat xavfsizlik xizmatini boshqarib kelayotgan edi, 2017−2020-yillarda Milliy gvardiya qo‘mondoni bo‘lib ishlagan.
Bahodir Toshmatov (1964-yilda tug‘ilgan) Toshkent oliy umumqo‘shin qo‘mondonlik bilim yurti, O‘zbekiston Qurolli kuchlari akademiyasi, Rossiya Qurolli kuchlari bosh shtabi harbiy akademiyasining Oliy akademik kurslarini, shuningdek, Farg‘ona davlat universitetini tamomlagan. Harbiy fanlar falsafa doktori, dotsent.
U Turkiston harbiy okrugi qo‘shinlarida qo‘mondonlik shtabining turli lavozimlarida xizmat qilgan. 1992−1999-yillarda Mudofaa vazirligining rahbar lavozimlarida ishlagan, 1999−2008-yillarda Mudofaa vazirligining harbiy okruglari qo‘shinlariga qo‘mondonlik qilgan.
2008−2011-yillarda u mudofaa vaziri o‘rinbosari va birinchi o‘rinbosari, so‘ngra 2011−2013-yillarda — O‘zbekiston Prezidenti huzuridagi Milliy xavfsizlik kengashi kotibi bo‘lib ishlagan. 2013-yildan 2017-yilgacha Milliy gvardiya qo‘mondoni etib tayinlanishidan oldin u mudofaa vazirining birinchi o‘rinbosari sifatida faoliyat ko‘rsatgan.
Ma’lumot uchun, Viktor Mahmudov O‘zbekiston Prezidenti huzuridagi Xavfsizlik kengashi kotibi lavozimida faoliyat yuritib kelmoqda.
Izoh (0)