Xalq deputatlari Buxoro viloyat kengashining navbatdagi sessiyasida oziq-ovqat xavfsizligini ta’minlash va mahalliy bozorlardagi narx-navo barqarorligini saqlash masalalari muhokama qilingan. Sessiyada Xalq demokratik partiyasining viloyat kengashi raisi, deputat Zulfiya To‘yeva deputatlar bozorlarga tushib, oziq-ovqat mahsulotlari narxi bilan qiziqmaganini ma’lum qilgan. Bu haqda “Daryo” muxbiri xabar berdi.
Sessiyada so‘z olgan viloyat hokimi o‘rinbosari Botir Shahriyorov oziq-ovqat xavfsizligini ta’minlash va ichki bozordagi narx-navo barqarorligini saqlash bo‘yicha ko‘rilayotgan chora-tadbirlar to‘g‘risida axborot bergan.
Ta’kidlashicha, Buxoroda aholining go‘sht, kartoshka, guruch, un, shakar, tuxum va o‘simlik yog‘iga bo‘lgan ehtiyojini to‘liq qondirish, bozorlarda narxlar barqarorligini saqlash uchun 2021-yilning may oyiga qadar 27,9 ming tonna go‘sht mahsuloti, 14 ming tonna parranda go‘shti, 7 ming tonna baliq, 51,2 ming tonna kartoshka, 9,3 ming tonna guruch, 75,6 ming tonna un, 10,5 ming tonna shakar, 201,3 million dona tuxum, 9,3 ming tonna o‘simlik yog‘i, 7 ming tonna piyoz va 18,9 ming tonna sabzi mahsulotlari kerak bo‘ladi.
Aytilishicha, viloyatda oziq-ovqat mahsulotlari narxining sun’iy oshirilishini o‘rganuvchi ishchi guruhlar ham tashkil etilgan.
Deputat Zulfiya To‘yeva oziq-ovqat narxlarining sun’iy oshishiga deputatlarning ham aybi borligini aytib, deputatlar nazoratni avvalo qishloqlardan boshlashi kerakligini ta’kidlagan.
“Shu yerda o‘tirgan deputatlar, o‘zimiz biror marta bozorga borib, mahsulotlar narxining sun’iy oshirilayotgani bilan qiziqdikmi? Yoki tadbirkordan mahsulotini qayerdan olib kelayotganini-chi, so‘radikmi? Bu bizning asosiy ishimiz-ku. Nega biz yuqoridan nimanidir kutishimiz kerak, nega mahalliy kengash sessiyalarida, o‘zimiz saylangan hududlarda shu ishlarni amalga oshirmayapmiz? Qachongacha bizga sessiyada topshiriq beriladi-yu, biz u topshiriqlarni bajaramiz? Har birimiz o‘z ishimizni odilona bajarsak, muammolar bu qadar chigallashib ketmaydi-ku. Qolaversa, qishloqlarda tomorqalarning gektar-gektar maydonlarida jo‘xori, beda ekilib, joy egallangan. Unda oziq-ovqat mahsulotlarini qayerda yetishtiramiz? Aholidan nega sholg‘om, kartoshkasini so‘ramaymiz? Nega sabzi ekmadingiz deb so‘ramaymiz? Bundan tashqari, o‘tgan sessiyalarda har bitta tumanda bittadan muzlatkich kameralar tashkil qilishni kelishib olgandik. Ammo o‘zgarish yo‘q”, — degan deputat Zulfiya To‘yeva.
Deputatning ushbu munosabati OAV vakillarida qo‘shimcha savol tug‘ilishiga sabab bo‘lgan.
“Daryo” muxbiri aholi tomorqalarida jo‘xori, beda ekilishining ham sababi borligini aytib, odamlar chorvasini boqish uchun yem-xashak yetishtirishga e’tibor qaratayotganini, yem-xashak esa chorva uchun zarurligini bildirib, “go‘sht narxi tushishi uchun avvalo, mana shu masalalarga e’tibor qaratish lozim emasmi?”, deya savol bergan.
Buxoro hokimi o‘rinbosari Botir Shahriyorov savolga javob berar ekan, oxirgi uch-to‘rt yilda go‘sht iste’molini mumkin qadar kamaytirib, uning o‘rnini bosuvchi — tovuq, baliq va quyon yetishtirish bo‘yicha alohida loyihalar amalga oshirilayotganini aytgan. Biroq chorva uchun yem-xashakni arzonlashtirish borasida qanday chora ko‘rilayotganiga aniq javob bermagan.
Ta’kidlanishicha, viloyatda 17 ta oziq-ovqat ulgurji ta’minoti kompaniyasi mavjud. Ular mahsulotlarini viloyatga to‘g‘ridan to‘g‘ri, vositachilarsiz olib kirib, omborxona va muzlatkich kameralarida oziq-ovqat zaxiralarini yaratgan.
Sessiyada, shuningdek, viloyat davlat soliq boshqarmasi boshlig‘i Sherzod Ashurov o‘simlik yog‘i narxi oshganining asosiy sabablari va uni bartaraf etish bo‘yicha ko‘rilayotgan choralar xususida to‘xtalgan bo‘lsa, IIB boshlig‘i Shuhrat Aliyev 2020-yilning o‘tgan to‘qqiz oyi davomida ichki ishlar organlari xodimlari tomonidan huquqbuzarliklar profilaktikasi va jinoyatchilikka qarshi kurashish borasida amalga oshirilgan ishlar yuzasidan axborot bergan.
Izoh (0)