O‘zbekistonda elektr energiyasini hisobga olishning avtomatlashtirilgan tizimi 2021-yildan ishga tushiriladi

Hukumat “Elektr energiyasini hisobga olish va nazorat qilishning avtomatlashtirilgan tizimini joriy etishni jadallashtirish chora-tadbirlari to‘g‘risida”gi qarorni qabul qildi. Bu haqda Norma xabar qilmoqda.

Prezidentning 2019-yil 9-iyuldagi “Yoqilg‘i-energetika sohasida o‘zaro hisob-kitoblarni yanada takomillashtirish va moliyaviy barqarorlikni oshirish chora-tadbirlari to‘g‘risida” PF-5761-son farmonini amalga oshirish, shuningdek elektr energiyasini hisobga olish va nazorat qilishning avtomatlashtirilgan tizimini joriy etish maqsadida:

• elektr energiyasini hisobga olish va nazorat qilishning avtomatlashtirilgan tizimi (EHNAT) “ishlab chiqarish — podstansiya — taqsimlash punkti — transformator podstansiyasi — iste’molchi” zanjiriga asoslanadi;
• hisoblagichlar birinchi navbatda yirik iste’molchilar va tadbirkorlik sub’ektlarida o‘rnatiladi;
• aholi yashash punktlarida barcha iste’molchilarga, taqsimlash punktlari va transformatorlarga hisoblagich va konsentratorlar bir vaqtning o‘zida o‘rnatiladi;
• avtomatlashtirilgan tizimni o‘rnatish va foydalanish samaradorligini oshirish uchun joylardagi barcha xodimlarning ko‘nikma va malakasi oshiriladi.

Quyidagilar hujjat bilan tasdiqlandi:

• elektr energiyasini hisobga olish uskunalari, konsentrator va butlovchi qismlar ishlab chiqarish va yetkazib berish grafigi;
• hududlarning shahar va tumanlari kesimida EHNATni joriy etish grafigi;
• EHNATni joriy etishni tashkillashtirish bo‘yicha hududiy hamda tuman va shaharlar bo‘yicha ishchi guruhlarning namunaviy tarkibi;
• hududlarda mutaxassislarni EHNATni joriy etish va foydalanishga o‘rgatish bo‘yicha amaliy mashg‘ulotlar o‘tkazish grafigi.

Qaror bilan EHNATning joriy etilishini nazorat qilish, natijadorligini o‘rganish va tahlil qilish maxsus komissiyasi tashkil etiladi. Komissiya va ishchi guruhlarning amalga oshirilgan ishlar to‘g‘risida hisobotlari xalq deputatlari tuman va viloyatlar Kengashlarida eshitiladi.

Energetika vazirligiga“Hududiy elektr tarmoqlari” AJ bilan birgalikda loyihaning TIAni 2020-yil 1-noyabrga qadar yakunlash, 2021-yil 1-yanvardan boshlab esa hisobga olish tizimining uzluksiz ishlashi, elektr energiyasi uchun to‘lovlarni o‘z vaqtida va to‘liq undirishni ta’minlash topshirildi.

Hujjat 2020-yil 29-sentabrda kuchga kirdi.