Toshkentdagi avtobuslar yo‘lovchilari uchun bir kunda 16,8 mln so‘mlik qo‘lqop sotib olinayotgani ma’lum qilindi

Toshkent shahrida harakatlanadigan jamoat transporti avtobuslarining yo‘lovchilari uchun bir kunda 16,8 million so‘mlik qo‘lqoplar xarid qilinmoqda. Bu haqda “Toshshahartransxizmat” aksiyadorlik jamiyati axborot xizmati ma’lum qildi.

Toshkent shahar jamoat transportida yo‘lovchilarning qo‘lqop kiyishi majburiy etib belgilanganidan keyin “Kun.uz” nashri Toshkent shahar Transport boshqarmasi ma’lumotlariga tayanib, Toshkentda metro va avtobus yo‘lovchilari uchun kuniga o‘rtacha 28 million so‘mlik qo‘lqop xarid qilinayotgani haqida maqola e’lon qilgan.

Kompaniya tomonidan ma’lum qilinishicha, jamoat transportida yo‘lovchilarni bepul qo‘lqoplar bilan ta’minlash maqsadida “Toshshahartransxizmat” aksiyadorlik jamiyati “Poliplast Dizayn” MChJ hamda “Biznes Tech Mir” MChJ korxonalari bilan bir martalik qo‘lqoplarni xarid qilish bo‘yicha muzokaralar olib bordi.

Muzokaralar natijasiga ko‘ra, “Poliplast Dizayn” MChJ bir juft qo‘lqopni 56 so‘mdan. “Biznes Tech Mir” MChJ esa bir juft qo‘lqopni 70 so‘mdan taqdim etishi ma’lum bo‘ldi.

“Toshshahartransxizmat” yuqoridagi ikki korxonadan eng ma’quli “Poliplast Dizayn” MChJ deb topib, shartnoma imzolagan.

Ma’lum qilinishicha, hozirgi vaqtda “Toshshahartransxizmat” avtobuslariga bir kunda 300 ming dona bir martalik qo‘lqoplar tarqatilmoqda. Buning uchun kompaniya bir kunda 16 800 000 ming so‘mlik qo‘lqoplarni “Poliplast Dizayn” MChJ korxonasidan xarid qilmoqda.

Shuningdek, “Toshshahartransxizmat” AJ bir martalik qo‘lqoplarning kunlik hajmini yanada ko‘paytirish maqsadida polietilenli bir martalik qo‘lqoplar ishlab chiqaruvchi tadbirkor va ishbilarmonlarni qulay takliflar bo‘yicha hamkorlikka chaqirgan.

Avvalroq Toshkent shahar transport boshqarmasi boshlig‘i Anvar Jo‘rayev jamoat transportida yo‘lovchilarga tarqatiladigan har bir qo‘lqop 56 so‘mdan sotib olinayotgani va buning uchun ketadigan xarajatlar davlat tomonidan qoplab berilishini ma’lum qilgandi.

Eslatib o‘tamiz, turli yuqumli mavsumiy infeksiyalar tarqalishining oldini olish va yo‘lovchilar salomatligini asrash maqsadida 19-oktabrdan boshlab Toshkent shahar jamoat transporti (avtobus, metro, yo‘nalishli taksi) xizmatidan foydalanganda yo‘lovchilarning tibbiy niqob va qo‘lqopda bo‘lish tartibi joriy etildi va qo‘lqoplar yo‘lovchilarga bepul tarqatiladigan bo‘ldi.