Қашқадарё вилоятининг Ғузор туманидаги тақсимлаш маркази фаолияти тўхтатилди. Бу ҳақда хабар берган туман ҳокими Бекзод Суюнов туманда коронавирусдан даволанувчи беморлар йўқлиги сабаб тақсимлаш марказига эҳтиёж қолмаганини маълум қилди, дея хабар берди «Дарё» мухбири.
Таъкидланишича, бугун Ғузор туман ҳокимлигида Халқ депутатлари туман Кенгашининг навбатдаги сессияси бўлиб ўтган.
Сессияда сўз олган ҳоким Бекзод Суюнов тумандаги бозорларда озиқ-овқат маҳсулотларининг нархини барқарорлаштириш ҳақида сўз юритиб, вилоятдаги учта марказлардан бири бўлган, 150 ўринли тақсимлаш маркази фаолияти хусусида ҳам гапириб берган.
Айтилишича, Шўртан спорт мажмуасида ташкил этилган тақсимлаш маркази айни кунда коронавирусдан даволанувчи беморлар қолмагани сабаб ўз фаолиятини якунлаган.
«Мазкур тақсимлаш марказида фаолият юритувчи тиббиёт ходимларига ойига 500 миллион сўм ойлик маош тўлаб келардик. Шукурки, бу тақсимлаш марказига айни кунда эҳтиёж қолмагани боис ёпилди. Шу тақсимлаш марказига ҳеч кимнинг иши тушмасин деб, ёпдик», — дейди туман ҳокими Бекзод Суюнов бу ҳақда маълумот берар экан.
Эслатиб ўтамиз, тумандаги мазкур тақсимлаш маркази вилоятдаги учта марказнинг бири бўлиб, марказга олиб келинган фуқаролар тўлиқ таҳлилдан ўтказилганидан сўнг касаллик даражаси ва саломатлигининг ҳолатига кўра, шифохоналарга йўналтирилар эди.
Ғузор вилоятда биринчи бўлиб «қизил» ҳудуд мақомини олган туман бўлиб, вилоятда коронавирусдан вафот этган 64 ёшли биринчи бемор ҳам шу туманда истиқомат қилган.
Изоҳ (0)