Францияда COVID-19 коронавирус инфекциясига чалинган аҳолининг сони миллиондан ошди ва мамлакат бу борада Европанинг иккинчи давлатига айланди. Бу ҳақда АҚШнинг Жонс Ҳопкинс университети тақдим қилиб келаётган статистик маълумотларда қайд этилган.
Францияда 22 октябрь ҳолатига кўра касалликка чалинганлар сони 1 000 369 нафарга етган, 34 075 киши инфекция асоратлари оқибатида ҳаётдан кўз юмган.
Франция бир миллиондан кўпроқ аҳолисида коронавирус аниқланган дунёнинг еттинчи, Европа иттифоқининг эса иккинчи давлатига айланди. Бир неча кун аввал Испанияда коронавирус инфекцияси билан касалланганлар сони бир миллион нафардан ошганди.
Бутун дунёда коронавирусга чалинганлар сони 41,3 миллиондан ошган, 1,13 миллион бемор касаллик асоратлари оқибатида вафот этган, инфекциядан тузалганлар сони эса 28 миллиондан ошган. Энг кўп касалланиш ҳолатлари АҚШ, Ҳиндистон, Бразилия, Россия ва Аргентинада кузатилмоқда.
21 октябрда Польша, Чехия ва Германияда COVID-19 билан касалланиш кўрсаткичи бўйича суткалик антирекорд янгиланган, аввалроқ Италияда ҳам антирекорд ўзгарган. Чехия Европа қитъасида аҳоли сонига нисбатан олинган касалланишлар кўрсаткичи бўйича етакчилик қилмоқда.
Изоҳ (0)