Koronavirusdan himoyalanishda qo‘lqop taqishning samarasi antiseptiklarga qaraganda samarasizroq chora deb aytgan Rossiya bosh infeksionisti Vladimir Chulanov keyinchalik ikkala usul samaradorligi teng ekanligini aytdi. Bu haqda Meduza xabar bermoqda.
21-oktabr kuni “Interfaks” Vladimir Chulanovning qo‘lqop taqish antiseptiklarga qaraganda samarasizroq deb aytganini e’lon qilgandi. Infeksionist hamma ham undan to‘g‘ri foydalanmasligini, bu esa infeksiya yuqtirish xavfini oshirishini ta’kidlab, qo‘lqop taqishni ortiqcha chora deb aytgandi. Infeksionist, shuningdek, ayrimlar qo‘lqoplarni tashlab yubormasdan uzoq vaqt taqayotganini, bu ularni hech nimadan himoya qilmasligini, aksincha xavf paydo qilishini bildirgan.
“Virus, asosan, (90 foiz) havo tomchilari orqali yuqadi va faqat 10 foiz holatdagina kontakt yo‘li bilan, ya’ni virus qolgan joyga qo‘l bilan tegish va uni ko‘z, og‘izga tekkizish orqali yuqadi. Ushbu 10 foiz muhim rol o‘ynamaydi. Mening nazarimda, koronavirusning kontakt yo‘l bilan yuqishining oldini olishda eng samarali usul bu — jamoat transportiga kirish-chiqishda qo‘lni antiseptik vositalar bilan artishdir”, — degandi Vladimir Chulanov.
Keyinroq u o‘z so‘zlarini “TASS”ga izohlab, to‘g‘ri foydalanilsa, qo‘lqoplar ham, antiseptiklar ham bir xil samara berishini aytgan. Qo‘lqoplar bir martalik bo‘lishi kerak, undan qayta foydalanib bo‘lmaydi. Shuningdek, uni ehtiyotkorlik bilan yechib utilizatsiya qilish lozim. Qolaversa, qo‘lqopli qo‘llar bilan yuzga tegmaslik lozim. “Bir qo‘l bilan qo‘lqop manjetini ushlab, boshqa qo‘l bilan esa ikkinchi poy manjetni ushlab ifloslangan yuzasini ichkarida qoladigan qilib qayiramiz. Keyin qo‘lqoplar konteynerlarda utilizatsiya qilinadi, imkon qadar u yopiladigan chiqindi konteyneri bo‘lgani ma’qul”, — deb tushuntirgan Chulanov.
Moskvada 12-maydan boshlab jamoat joylarda, shu jumladan, jamoat transportida niqob va qo‘lqop taqish majburiy etib belgilangan. Faqat uyda yoki alohida kabinetda o‘tirgandagina niqob va qo‘lqop taqmaslik mumkin. Unga rioya qilmaganlar 4 ming rubldan 5 ming rublgacha (taxminan, 500 mingdan 700 ming so‘mgacha) jarimaga tortiladi.
Toshkentda ham turli yuqumli mavsumiy infeksiyalar tarqalishining oldini olish va yo‘lovchilar salomatligini asrash maqsadida 19-oktabrdan boshlab jamoat transporti (avtobus, metro, yo‘nalishli taksi) xizmatidan foydalanganda yo‘lovchilarning tibbiy niqob va qo‘lqopda bo‘lish tartibi joriy etildi. Ular yo‘lovchilarga bepul taqdim etiladi. Tarqatiladigan tibbiy qo‘lqoplar transport korxonalari hisobidan, ya’ni davlat tomonidan qoplanadi.
JSST “Qo‘lqop taqish kerakmi?”, degan savolga “Yo‘q, sizni COVID-19’dan rezina qo‘lqopdan ko‘ra, qo‘llarni sovunlab yuvish yaxshiroq himoya qiladi” deb javob bergandi. Alohida ekspertlar ham ushbu fikrni ma’qullagan.
Izoh (0)