UzAuto Motors Monopoliyaga qarshi kurashish qo‘mitasini OAVga bosim o‘tkazayotganlikda ayblagani to‘g‘risida xabar berilgandi. Axborot va ommaviy kommunikatsiyalar agentligi UzAuto Motors’ning mazkur ayblovi yuzasidan o‘z vakolati doirasida to‘liq o‘rganishlar amalga oshirilishini ma’lum qildi.
UzAuto Motors 21-oktabr kuni Monopoliyaga qarshi kurashish qo‘mitasi (MQKQ) o‘rtasidagi sud jarayonini yoritayotgan OAVga bosim o‘tkazilayotganidan tashvishda ekanini bildirgan. Avto ishlab chiqaruvchi matbuot xizmatining xabar berishicha, kompaniya ayrim amaldorlarning jurnalistlarga nisbatan senzura va cheklovlardek xato amaliyotga intilishiga yo‘l qo‘yib bo‘lmaydi deb hisoblaydi.
Ma’lum qilinishicha, agentlik avtokompaniya da’vosiga ko‘ra davlat idorasining OAVlarga yaqqol bosim o‘tkazgani (go‘yoki) isbotlangan faktlarni o‘z vakolati doirasida to‘liq o‘rganib chiqadi.
Biz OAVlarga nisbatan har qanday usulda bosim uyushtirishga yo‘l qo‘yilmasligi lozim deb hisoblaymiz.Eslatib o‘tamiz, 2-oktabrdan boshlab Toshkent shahar ma’muriy sudida UzAuto Motors kompaniyasining Monopoliyaga qarshi kurashish qo‘mitasi maxsus komissiyasi qarorini bekor qilish bo‘yicha kiritgan shikoyati ko‘rib chiqilmoqda.O‘zbekistonda so‘z va matbuot erkinligi, OAVlarning mustaqil faoliyati va davlat organlarining ochiqligiga erishish davlat siyosati darajasiga ko‘tarilgan. Chunki aynan shu yo‘l orqali O‘zbekistonning faol ijtimoiy-iqtisodiy rivojlanishiga hamda axborot xilma-xilligi ta’minlanishiga mustahkam zamin yaratish mumkin.
O‘z o‘rnida AOKA barcha OAVlarni qonuniylik, haqqoniylik, xolislik tamoyillariga amal qilgan holda faoliyat yuritishga chorlaydi va yuqoridagi masalaga soha ekspertlarining o‘rganishlari natijasiga asosan tegishli baho berilishini ma’lum qiladi.
Axborot va ommaviy kommunikatsiyalar agentligi
2020-yil 16-oktabrda bo‘lib o‘tgan jamiyat va qo‘mita o‘rtasidagi sudning 3 yig‘ilishidan so‘ng Antimonopoliya qo‘mitasi sukut saqlash “an’anasi”ni buzgan edi. 17-oktabrda qo‘mita o‘z bayonotida “Shu vaqtga qadar qo‘mita sud jarayoni tafsilotlariga hech qanday izoh bermay kelayotgandi, chunki UzAutoMotors AJ tomonidan keltirilgan har qanday da’vo va shikoyatlariga qo‘mitaning ekspertlari tomonidan bevosita ish ko‘rilish jarayonida javob berib kelinmoqda”, — deya qayd etgandi. O‘shanda qo‘mita UzAuto Motors kompaniyasini davlat organiga nisbatan axloqiy me’yorlardan chiqmagan holda mulohaza yuritishga chaqirgandi.
Izoh (0)