UzAuto Motors Монополияга қарши курашиш қўмитасини ОАВга босим ўтказаётганликда айблагани тўғрисида хабар берилганди. Ахборот ва оммавий коммуникациялар агентлиги UzAuto Motors’нинг мазкур айблови юзасидан ўз ваколати доирасида тўлиқ ўрганишлар амалга оширилишини маълум қилди.
UzAuto Motors 21 октябрь куни Монополияга қарши курашиш қўмитаси (МҚКҚ) ўртасидаги суд жараёнини ёритаётган ОАВга босим ўтказилаётганидан ташвишда эканини билдирган. Авто ишлаб чиқарувчи матбуот хизматининг хабар беришича, компания айрим амалдорларнинг журналистларга нисбатан цензура ва чекловлардек хато амалиётга интилишига йўл қўйиб бўлмайди деб ҳисоблайди.
Маълум қилинишича, агентлик автокомпания даъвосига кўра давлат идорасининг ОАВларга яққол босим ўтказгани (гўёки) исботланган фактларни ўз ваколати доирасида тўлиқ ўрганиб чиқади.
Биз ОАВларга нисбатан ҳар қандай усулда босим уюштиришга йўл қўйилмаслиги лозим деб ҳисоблаймиз.Эслатиб ўтамиз, 2 октябрдан бошлаб Тошкент шаҳар маъмурий судида UzAuto Motors компаниясининг Монополияга қарши курашиш қўмитаси махсус комиссияси қарорини бекор қилиш бўйича киритган шикояти кўриб чиқилмоқда.Ўзбекистонда сўз ва матбуот эркинлиги, ОАВларнинг мустақил фаолияти ва давлат органларининг очиқлигига эришиш давлат сиёсати даражасига кўтарилган. Чунки айнан шу йўл орқали Ўзбекистоннинг фаол ижтимоий-иқтисодий ривожланишига ҳамда ахборот хилма-хиллиги таъминланишига мустаҳкам замин яратиш мумкин.
Ўз ўрнида АОКА барча ОАВларни қонунийлик, ҳаққонийлик, холислик тамойилларига амал қилган ҳолда фаолият юритишга чорлайди ва юқоридаги масалага соҳа экспертларининг ўрганишлари натижасига асосан тегишли баҳо берилишини маълум қилади.
Ахборот ва оммавий коммуникациялар агентлиги
2020 йил 16 октябрда бўлиб ўтган жамият ва қўмита ўртасидаги суднинг 3 йиғилишидан сўнг Антимонополия қўмитаси сукут сақлаш «анъанаси»ни бузган эди. 17 октябрда қўмита ўз баёнотида «Шу вақтга қадар қўмита суд жараёни тафсилотларига ҳеч қандай изоҳ бермай келаётганди, чунки UzAutoMotors АЖ томонидан келтирилган ҳар қандай даъво ва шикоятларига қўмитанинг экспертлари томонидан бевосита иш кўрилиш жараёнида жавоб бериб келинмоқда», — дея қайд этганди. Ўшанда қўмита UzAuto Motors компаниясини давлат органига нисбатан ахлоқий меъёрлардан чиқмаган ҳолда мулоҳаза юритишга чақирганди.
Изоҳ (0)