Niderlandiyalik erkak bir parcha go‘shtga tiqilib qoldi va toki unga shifokorlar uyqu tabletkalarini bermaguncha 8 yil davomida na gapirdi, na harakat qila oldi, deb yozadi Daily Mail.
2012-yil Richard ismli bemor 29 yoshda bo‘lgan. U tiqilib qolgan bir parcha go‘sht tufayli miyasiga shikast yetib, u akinetik mutizm deb nomlangan ruhiy holatga tushib qoldi. Ushbu tashxis qo‘yilgan bemorlar jismonan harakatlarni amalga oshirishga qodir bo‘lsa-da, afsuski, gapirolmaydi va qimirlashni ham uddalay olmaydi. Ular faqat ko‘zlarini ochishi mumkin.
Richard hozir 37 yoshda. Shifokorlar uning ahvolini yaxshilash uchun boshqa hech qanday chora yo‘qligini ma’lum qilgach, bemorning oilasi uni uyqu dori yordami bilan tajriba sifatida davolashga rozi bo‘ldi. Shifokorlar miyasi shikastlangan bemorga nutq va harakatni vaqtincha tiklashga yordam beradigan uyqu tabletkasini qo‘lladi.
Bemor preparatni qabul qilganidan 20 daqiqa o‘tib, hamshiradan nogironlar aravachasini harakatlantirishda yordam berishini so‘radi va ukalarini taniy boshladi. Shuningdek, bemor avval otasini ko‘rishni va fastfud taomlaridan iste’mol qilishni xohlayotganini aytdi.
Shifokorlar Richard miyasining bir qismi hissiy faollikning haddan tashqari ko‘p yuklanishi tufayli butunlay ishlamayotganini aniqladi. Uyqu tabletkalari miyadagi harakatni 2 soat davomida to‘xtatishga yordam beradi va bu Richardda yurish hamda gaplashish imkonini paydo qiladi.
Shu tarzda shifokorlar ushbu davolash usulini bir necha kunlar davomida takrorladi, ammo keyin uyqu dorilari ham o‘z ishini to‘xtatdi. Richard esa yana avvalgi holatiga qaytdi. Tadqiqotchilar miyasi shikastlangan bemorlarni samarali davolash usullarini izlashda davom etmoqda.
Izoh (0)