Ryanair aviakompaniyasi yo‘lovchisi Inka Filyeva Londondan Ispaniyaning Valensiya shahriga uchishga qaror qilib, Kiyevga kelib qoldi. U samolyotga chiqish vaqtida adashib qolgan, aeroport xodimi esa beparvolik qilib, chiptani tekshirmagan. Filyeva o‘zining qiziqarli sayohati haqida Facebook’dagi sahifasiga yozib qoldirgan.
“Ana bo‘lmasam! Valensiyaga boraman deb, Kiyevga kelib qoldim”, — deb yozadi 30 yoshli sayohatchi.
Daily Star’ning yozishicha, ayol 18-oktabr kuni erta tongda Londondan Valensiyaga uchmoqchi bo‘lgan. Biroq samolyotga chiqish yo‘laklarini adashtirib qo‘ygan. Xodimlar mazkur xatolikka e’tibor qaratmagan va uning chiptasini skanerdan o‘tkazib, ayolni salonga kirgizgan.
Ukraina poytaxtiga uchib kelgan ayol aeroportdagi yozuvlar ukrain tilida ekanligini va politsiyachilar umuman boshqa formada yurganini payqab qolgan.
“Qanday qilib kelib qolganimni hech kim bilmasdi va ular tinmay Kiyevga olgan chiptamni so‘rashardi. Men har safar ularga Valensiyaga deb olgan chiptamni ko‘rsatdim, ular esa bu qanday sodir bo‘lganini tushuna olishmasdi”, — deydi Filyeva.
Bir kechani aeroport yaqinidagi mehmonxonada o‘tkazgan ayol 19-oktabr kuni yana Londonga uchib ketgan.
Filyeva vaziyatni tushungan va yordam ko‘rsatgan Ukraina aeroporti xodimlariga minnatdorchilik bildirgan.
Izoh (0)