Namangan viloyatida KIA Bongo va MAN yuk mashinalari o‘zaro to‘qnashuvi natijasida bir kishi halok bo‘ldi, deya xabar bermoqda Namangan viloyati IIB axborot xizmati.
Qayd etilishicha, 2020-yil 8-oktabr kuni soat 14:30 larda Namangan–Pungon yo‘lining 62-kilometrida Namangan shahrida yashagan, 1981-yilda tug‘ilgan fuqaro KIA Bongo rusumli avtomashinasini boshqarayotib, harakat xavfsizligini ta’minlay olmagan.
Oqibatda haydovchi yo‘lning o‘ziga nisbatan qarama-qarshi tomoniga o‘tib ketib, Pungon yo‘nalishi bo‘ylab harakatlanib kelayotgan Uychi tumanida yashovchi, 1996-yilda tug‘ilgan fuqaro boshqaruvida bo‘lgan MAN rusumli yuk mashinasi bilan to‘qnashib ketgan.
Natijada KIA Bongo rusumli avtomashina haydovchisi olgan tan jarohati oqibatida shifoxonada vafot etgan.
Ushbu holat bo‘yicha tuman IIB huzuridagi Tergov bo‘limi tomonidan 2020-yil 15-oktabr kuni Jinoyat kodeksining 266-moddasi 2-qismi (odamlar o‘limiga olib kelgan transport vositalari harakati yoki ulardan foydalanish xavfsizligi qoidalarini buzish) bilan jinoyat ishi qo‘zg‘atilgan.
Avvalroq Jizzaxda yoritish chiroqlarisiz harakatlangan Cobalt yuk mashinasiga urilishi oqibatida bir kishi, Farg‘onada avtomobil boshqaruvini yo‘qotib, daraxtga urilgan 16 yoshli haydovchi, Andijonda Damas yuk mashinasiga urilishi oqibatida voyaga yetmagan yo‘lovchi va Chilonzorda avtomobil boshqaruvini yo‘qotib, daraxtga urilgan 21 yoshli haydovchi halok bo‘lgani haqida xabar berilgandi.
Izoh (0)