Лукашенко ҳукумат тепасида ўз тарафдорларининг хавфсизлигини таъминлаш учун қолганини маълум қилди

Беларусь президенти Александр Лукашенко ўз тарафдорларини у ҳокимиятдан кетганидан кейин вазият қандай бўлиши ҳақида ўйлашга чақирди. Бу ҳақда «Интерфакс» хабар берган.

«Беларусь президентига келсак, у зўрлик билан ушлаб турилган ҳукумат узоққа бормаслиги ҳақида кўп гапирган. Гап менда эмас. Масала сизларда қолган: бу мамлакатда менсиз аҳволингиз не кечади?», – дея Лукашенконинг сўзларидан иқтибос келтирган «БелТА».

Александр Лукашенко ушбу гаплари билан ўзининг мамлакатдаги ўрни борасидаги фикрларда ошириб юборган бўлиши мумкинлигини ҳам қайд этган.

«Сиз ушбу мамлакатда яшашда давом этасиз. Хўш, нима бўлади? Сиз улар кечаги воқеалар сабаб сизга ачинади деб ўйлайсизми? Улар раҳм қиладими? Аксинча, сизларни қиймалаб ташлаши ҳеч гап эмас», – деган Лукашенко.

Эслатиб ўтамиз, Беларусда 9 август куни бўлиб ўтган сайловларни сохталаштириш ҳақидаги маълумотлар фонида норозилик намойишлари бошланди ва ҳалигача давом этмоқда. Намойишчилар Лукашенкони сайлов натижаларини сохталаштиришда айбламоқда. Сайлов натижаларига кўра, Александр Лукашенко 80 фоиз овоз тўплаган.

Беларусь Марказий сайлов комиссияси маълумотларига кўра, Светлана Тихановская президентлик сайловида 10,1 фоиз овоз тўплаган. Тихановскаянинг ўзи эса мағлубиятини тан олмади ва ўзини «Беларусь халқи томонидан сайланган ягона етакчи» деб атади. Сайловдан икки кун ўтгач Тихановская Литвага чиқиб кетган. Унинг сафдошлари Тихановская ҳукумат босими остида мамлакатдан чиқиб кетганини маълум қилган.

Собиқ президентликка номзод Светлана Тихановскаянинг тарафдорлари 18 август куни янги сайловлар ўтказиш орқали мамлакатда ҳокимиятни транзит қилиш мақсадида Мувофиқлаштирувчи кенгаш тузди. Беларусь бош прокурори Александр Конюкнинг  таъкидлашича, мухолифат Мувофиқлаштирувчи кенгаш фаолияти конституцияга қарши ва ҳокимиятни қўлга олишга қаратилган.

Кенгашнинг ташкил этилиши муносабати билан Жиноят кодексининг 361-моддаси билан жиноят иши қўзғатилиб, унинг доирасида мувофиқлаштирувчи кенгашнинг бир нечта вакиллари ҳибсга олинган.

Беларусь президенти Александр Лукашенко 10 октябрь куни Давлат хавфсизлик қўмитаси тергов ҳибсхонасида Мувофиқлаштирувчи кенгаш ва мухолифатнинг қўшма штабининг ҳибсга олинган вакиллари билан учрашди. Кейинчалик, Беларусь ҳукумати Светлана ва Сергей Тихановскийга 134 кун ичида биринчи марта суҳбатлашишига рухсат этди, 13 октябрда Тихановскаянинг Беларусь ҳукуматига «халқ ультиматум»ини эълон қилгани ҳақида хабар берилди.