Toshkent viloyati Zangiota tumanida tashkil etilgan koronavirusga chalingan bemorlarni davolovchi maxsus kasalxonada kasallangan bemorlar uchun ishlatilgan tibbiy buyumlardan iborat chiqindilarning bir qismi atrof-muhitga tashlanmoqda. Bu haqda Oliy Majlis Qonunchilik palatasi deputati Rasul Kusherbayev ma’lum qildi.
Deputatning bildirishicha, kuni kecha Toshkent viloyati Zangiota, Quyi Chirchiq tumanlari, Chirchiq daryosi atrofiga tashlangan bunday chiqindilar aholining keskin e’tiroziga sabab bo‘ldi.
“Bugun menga kelgan murojaat va ma’lumotlarga ko‘ra, ayni vaqtda uchta hududda ana shunday chiqindilarni tashlab ketish holatlari aniqlangan. Achinarlisi, koronavirusda ishlatilgan chiqindilar daryo suviga qadar sochilib ketgan”, — deya ma’lum qilgan Kusherbayev.
Deputat tomonidan berilgan ma’lumotga ko‘ra, yaqin vaqtgacha bunday chiqindilarni yo‘q qilish bilan shug‘ullanib kelgan Med Class Plus MChJ bu xizmatni to‘xtatishi oqibatida shunday muammo kelib chiqqan. Ushbu tadbirkorlik subyekti standartlarga muvofiq, koronavirusda ishlatilgan buyumlar chiqindisini yoqib, yo‘q qilish bilan shug‘ullanib kelgan. Biroq mas’ullar tomonidan negadir ushbu MChJdan bu xizmat olinib, boshqa tadbirkorga berilgan. Yangi tadbirkor chiqindilarni to‘liq yoqib, yo‘q qilishning uddasidan chiqa olmagach, yashirincha atrofga chiqarib to‘kishni boshlagan.
“Ozgina foyda olaman deb, o‘z yaqinlari, yurtdoshlari, qolaversa, mamlakat taqdirini xavf ostiga qo‘yib, bunday ish bilan shug‘ullanishni nima deb atasa bo‘ladi o‘zi? Pastkashlik. Bunday qilayotgan odamning o‘zi ham uni yashirincha qo‘llab-quvvatlab, foydani “arra” qilmoqchi bo‘lgan mas’ullar ham eng pastkash va kechirib bo‘lmaydigan ishga qo‘l urishibdi. Buning boshqa nomi yo‘q. Bu xalqni og‘ir kunidan foydalanib qilingan jinoyat”, — deya fikrini bildirgan Rasul Kusherbayev.
Parlament a’zosi barcha darajadagi huquqni muhofaza qilish organlari va mas’ullar bu vaziyatni shunchaki qoldirmay tezkor choralar ko‘rishiga umid bildirgan. “Shuningdek, qonunga muvofiq chiqindi tashlangan hududlarni virusdan to‘liq zararsizlantirish, muammoni hal etish va aybdorlarni jazolashlarini ham talab qilamiz”, — deyiladi deputatning postida.
Eslatib o‘tamiz, sog‘liqni saqlash vaziri birinchi o‘rinbosari Abduhakim Hodjiboyevning Zangiotadagi shifoxonada o‘tkazgan yig‘ilishining audioyozuvi tarqalib ketgandi, unda vazir o‘rinbosari “kislorod bosimi tushib ketayotgani uchun” ushbu shifoxonada “har kuni bir necha odam o‘layotgani”ni ta’kidlagan.
Shuningdek, 2020-yil 18-oktabrda ijtimoiy tarmoqlarda Zangiotadagi koronavirusga chalingan bemorlarni davolashga ixtisoslashtirilgan yuqumli kasalliklar shifoxonasi darvozasi oldida yuzaga kelgan navbat videosi tarqaldi, videoga ilova qilingan matnda “shifoxona o‘likxonasidan mayyitlarni olib ketish qiyin bo‘lib qolgan – odamlar qarindoshi vafot etganligini tasdiqlovchi hujjatni olib kelib ham soatlab kutishga majbur bo‘lmoqda, tobut tashiydigan mashinalar esa narxlarni 700 mingdan boshlab ko‘tarib tashlagan”i qayd etilgandi.
Izoh (0)