Andijonda o‘z o‘g‘lini so‘kib, haqoratlagan ota ikkinchi marotaba sudlandi. Bu haqda “Daryo”ga Jinoyat ishlari bo‘yicha viloyat sudi sudya katta yordamchisi Komronshoh Rasulov ma’lum qildi.
Ta’kidlanishicha, Andijon viloyatida yashovchi 64 yoshli O‘ktam Bo‘riyev 2019-yil 19-sentabr kuni o‘g‘lini haqorat qilgani uchun Ma’muriy javobgarlik to‘g‘risidagi kodeksning 41-moddasiga muvofiq jarima to‘lagan. Ota 2020-yil 11-iyul kuni soat 08:40 da o‘zi bilan qo‘shni bo‘lib yashaydigan o‘g‘li Doston Bo‘riyevni yana haqorat qilgan. Ota o‘g‘li unga tegishli bo‘lgan bodomlarni terayotganligini ko‘rib jahli chiqqach, o‘g‘lini uyatsiz so‘zlar bilan haqorat qilgan. Bundan tashqari yo‘l chetida turgan toshlardan olib o‘g‘liga tegishli Nexia-2 avtomashinasiga otgan.
Sudlanuvchining aybi, o‘g‘ilning arizasi, ishdagi mavjud yozma dalillar, jumladan, tushuntirish xatlari, guvohlarning ko‘rsatmalari, yuzlashtirish bayonnomalari hamda ish bo‘yicha to‘plangan boshqa dalillar yig‘indisi bilan o‘z isbotini topgan.
Sud sudlanuvchi O‘ktam Bo‘riyevni o‘g‘li Doston Bo‘riyevning sha’ni va qadr-qimmatini beodoblik bilan qasddan tahqirlab, uni haqorat qilganlikda ifodalangan harakatlari bilan Jinoyat kodeksining 140-moddasining 1-qismida (haqorat qilish) nazarda tutilgan jinoyatni sodir etgan degan to‘xtamga kelib, unga nisbatan bazaviy hisoblash miqdorining besh baravari miqdorida — 1 million 115 ming so‘m jarima jazosi tayinlagan.
Izoh (0)