“Antitanalar miqdori organizmga tushgan virus hajmiga bog‘liq” — Koronavirusga qarshi kurash shtabi a’zosi

Qondagi antitanalar miqdori organizmga tushgan virus hajmiga bog‘liq bo‘lgan holda ishlab chiqariladi. Bu haqda Koronavirusga qarshi kurash shtabi a’zosi Sevara Ubaydullayeva AOKA huzurida tashkil etilgan brifingda ma’lum qilgan.

Organizmga infeksiya tushganidan so‘ng uning alomatlari yuzaga chiqadigan bo‘lsa, bir hafta davomida kasallik avj olgan davri deymiz. Keyin sekin-asta organizmning tiklanish davri bo‘ladi. Bu davrda organizmda immunoglobulin M va G ishlab chiqilishi kerak. Birinchi bo‘lib immunoglobulin M antitanasi virus organizmga tushganidan yoki alomatlari sezilganidan 7-8 kundan boshlab chiqadi. Bu davrda turg‘un immunitet hali bo‘lmaydi. Organizmda kasallikka nisbatan kurashuvchan qobiliyat, unga nisbatan ma’lum foizda sizni himoya qiluvchi immunoglobulin G antitanalari kasallikning 21-18 kunlarida maksimal darajada ishlab chiqarilib, sekin-asta ko‘tarilib boradi. Antitana organizmga tushgan virus hajmiga bog‘liq bo‘lgan holda ishlab chiqariladi. Uning hajmi qondagi antitanalar miqdoriga qarab baholanadi.

Sevara Ubaydullayeva, Koronavirusga qarshi kurash shtabi a’zosi

Avvalroq COVID-19 kasalligini o‘tkazgan ba’zi bemorlar organizmidagi qon tarkibida 90 kungacha virus aylanib yurishi tasdiqlangani, ayni davrda inson virus tarqatuvchi bo‘lib yurishi haqidagi ma’lumotlar to‘liq tasdiqlanmagani, O‘zbekistonda pandemiya boshlanganidan buyon koronavirusga chalinganlarning qayta kasallanishi holatlari kuzatilmagani, koronavirusdan tuzalgan bemorlarda 3 oygacha antitanalar saqlanib qolinishi aytilgan edi. Eslatib o‘tamiz, Sanitariya-epidemiologiya nazorati inspeksiyasi bosh inspektori Nurmat Otabekov virusli kasalliklar, ayniqsa, respirator kasalliklar bilan og‘rigan odamlarda hosil bo‘lgan immun tizimi orttirilgan immunitet hisobiga ushbu kasallik bilan qayta kasallanishga yo‘l qo‘ymasligini ta’kidlagan.  Shuningdek, Maxsus komissiya tomonidan kerakli sharoitlarga ega bo‘lgan xususiy sektorda faoliyat ko‘rsatuvchi laboratoriyalarga ham koronavirusni aniqlovchi polimeraza zanjir reaksiyasi (PZR), immunoferment tahlil (IFA) va IXLA tahlillarini o‘tkazish huquqi berilgani qayd etilgan.