Тошкент вилояти Зангиота туманида ташкил этилган коронавирусга чалинган беморларни даволовчи махсус касалхонада касалланган беморлар учун ишлатилган тиббий буюмлардан иборат чиқиндиларнинг бир қисми атроф-муҳитга ташланмоқда. Бу ҳақда Олий Мажлис Қонунчилик палатаси депутати Расул Кушербаев маълум қилди.
Депутатнинг билдиришича, куни кеча Тошкент вилояти Зангиота, Қуйи Чирчиқ туманлари, Чирчиқ дарёси атрофига ташланган бундай чиқиндилар аҳолининг кескин эътирозига сабаб бўлди.
«Бугун менга келган мурожаат ва маълумотларга кўра, айни вақтда учта ҳудудда ана шундай чиқиндиларни ташлаб кетиш ҳолатлари аниқланган. Ачинарлиси, коронавирусда ишлатилган чиқиндилар дарё сувига қадар сочилиб кетган», — дея маълум қилган Кушербаев.
Депутат томонидан берилган маълумотга кўра, яқин вақтгача бундай чиқиндиларни йўқ қилиш билан шуғулланиб келган Меd Class Plus МЧЖ бу хизматни тўхтатиши оқибатида шундай муаммо келиб чиққан. Ушбу тадбиркорлик субъекти стандартларга мувофиқ, коронавирусда ишлатилган буюмлар чиқиндисини ёқиб, йўқ қилиш билан шуғулланиб келган. Бироқ масъуллар томонидан негадир ушбу МЧЖдан бу хизмат олиниб, бошқа тадбиркорга берилган. Янги тадбиркор чиқиндиларни тўлиқ ёқиб, йўқ қилишнинг уддасидан чиқа олмагач, яширинча атрофга чиқариб тўкишни бошлаган.
«Озгина фойда оламан деб, ўз яқинлари, юртдошлари, қолаверса, мамлакат тақдирини хавф остига қўйиб, бундай иш билан шуғулланишни нима деб атаса бўлади ўзи? Пасткашлик. Бундай қилаётган одамнинг ўзи ҳам уни яширинча қўллаб-қувватлаб, фойдани «арра» қилмоқчи бўлган масъуллар ҳам энг пасткаш ва кечириб бўлмайдиган ишга қўл уришибди. Бунинг бошқа номи йўқ. Бу халқни оғир кунидан фойдаланиб қилинган жиноят», — дея фикрини билдирган Расул Кушербаев.
Парламент аъзоси барча даражадаги ҳуқуқни муҳофаза қилиш органлари ва масъуллар бу вазиятни шунчаки қолдирмай тезкор чоралар кўришига умид билдирган. «Шунингдек, қонунга мувофиқ чиқинди ташланган ҳудудларни вирусдан тўлиқ зарарсизлантириш, муаммони ҳал этиш ва айбдорларни жазолашларини ҳам талаб қиламиз», — дейилади депутатнинг постида.
Эслатиб ўтамиз, соғлиқни сақлаш вазири биринчи ўринбосари Абдуҳаким Ҳоджибоевнинг Зангиотадаги шифохонада ўтказган йиғилишининг аудиоёзуви тарқалиб кетганди, унда вазир ўринбосари «кислород босими тушиб кетаётгани учун» ушбу шифохонада «ҳар куни бир неча одам ўлаётгани»ни таъкидлаган.
Шунингдек, 2020 йил 18 октябрда ижтимоий тармоқларда Зангиотадаги коронавирусга чалинган беморларни даволашга ихтисослаштирилган юқумли касалликлар шифохонаси дарвозаси олдида юзага келган навбат видеоси тарқалди, видеога илова қилинган матнда «шифохона ўликхонасидан маййитларни олиб кетиш қийин бўлиб қолган – одамлар қариндоши вафот этганлигини тасдиқловчи ҳужжатни олиб келиб ҳам соатлаб кутишга мажбур бўлмоқда, тобут ташийдиган машиналар эса нархларни 700 мингдан бошлаб кўтариб ташлаган»и қайд этилганди.
Изоҳ (0)