Toshkent viloyati Parkent tumanida suv sisternasi yorilib ketishi oqibatida 8 ta dala hovliga zarar yetdi, deb xabar beradi FVV matbuot xizmati.
Ma’lumotlarga ko‘ra, 20-oktabr kuni soat 04:30 larda Parkent tumani hududidagi hovlilardan birida ichida 2 ming kubometr suv bo‘lgan sisterna yorilib ketgan. Buning oqibatida holat yuz bergan joy yaqinida joylashgan 8 ta dala hovliga qisman zarar yetgan.
Hozirda Toshkent viloyati Favqulodda vaziyatlar boshqarmasining yong‘in-qutqaruv guruhlari voqea joyidagi xonadonlardan suv tortish ishlarini olib bormoqda. “Yuzaga kelgan vaziyatda jabrlangan va vafot etganlar aniqlanmagan”, — deyiladi xabarda.
Avvalroq Favqulodda vaziyatlar vazirligi xodimlari Zangiotada yonma-yon joylashgan uchta uyda chiqqan yong‘inni bartaraf etgani to‘g‘risida xabar berilgandi.
Izoh (0)