Zangiotada yonma-yon joylashgan uchta uyda yong‘in chiqdi

Toshkent viloyati Zangiota tumanidagi yonma-yon joylashgan uchta uyda chiqqan yong‘in o‘t o‘chiruvchilar tomonidan bartaraf etildi. Bu haqda FVV matbuot xizmati xabar berdi.

Ma’lumotlarga ko‘ra, 20-oktabr soat 07:19 da tumanning “Aloqa” mahalla fuqarolar yig‘ini hududida bir necha daqiqa farqi bilan qo‘shni bo‘lgan uchta uyda ketma-ket yong‘in sodir bo‘lgan.

Voqea joyiga zudlik bilan Toshkent viloyati FVB qutqaruvchilari yetib kelgan.

“Soat 08:05 da yong‘in o‘rab olingan bo‘lsa, 08:33 da to‘liq bartaraf etildi. Yong‘in hodisasi uylarning 400 metr kvadrat qismiga zarar yetkazgan. Yong‘in oqibatida jabrlangan va halok bo‘lgan fuqarolar aniqlanmagan”, — deyiladi xabarda.

Avvalroq poytaxtning Uchtepa tumanidagi savdo majmuasida yirik yong‘in kuzatilgani to‘g‘risida xabar berilgandi.

Eslatib o‘tamiz, O‘zbekistonda o‘tgan 2019—2020-yil kuz-qish mavsumiga tayyorgarlik ko‘rish va uni o‘tkazish davrida 6805 ta yong‘in sodir bo‘lib, oqibatda 82 nafar fuqaro halok bo‘lgan va 139 nafar inson kuyish tan jarohatini olgan.