Navoiy viloyatining Konimex tumanidagi 2-sonli “Oltin kalit” maktabgacha ta’lim tashkiloti shu yilning fevral oyida tantanali ravishda foydalanishga topshirilgan edi. Bog‘cha qurilishi uchun 4 milliard so‘m sarflangan. Shunga qaramasdan, hozirda muassasa ta’mirtalab ahvolga kelib qolgan. “Gazeta.uz”ning yozishicha, bu haqda “O‘zbekiston 24” telekanalining “Fakt 24” ko‘rsatuvida ma’lum qilindi.
“Mart oyining ikkinchi yarmida barcha ta’lim tashkilotlari karantin sabab yopilgan bo‘lsa, yangi bog‘cha qancha muddat faoliyat yuritdiki ta’mirga muhtoj bo‘lsa, yaxshiyamki hali yog‘in-sochinli kunlar kelmadi. Xo‘sh, bunga sabab nima? Davlat tomonidan ajratilgan mablag‘ manzilga yetib bormadimi? Sifatli loyiha qog‘ozda qolib, unga ajratilgan milliardlar qayoqqa ketdi?” — deyiladi ko‘rsatuvda.
Videodan ko‘rish mumkinki, binoning ichki devori va shiftida yoriqlar paydo bo‘lgan, bunga esa qurilish vaqtida g‘ishtlarning noto‘g‘ri terilgani sabab qilib ko‘rsatiladi. Konimex tumani maktabgacha ta’lim bo‘limi boshlig‘i Xonimgul Norboyeva esa intervyu davomida: “Yuqori tashkilotimizga xat bilan chiqdik. Bo‘limimiz qurilish firmalariga chiqib, maslahatlashib, buzib, devorni qaytadan tiklash ishlari boshlanib ketdi”, — deya qayd etadi.
“Devorni butunlay qaytadan qilib berish masalasini biz ko‘tarib chiqdik. Hech qanday devor qulamagan, faqat yoriq bo‘lgan edi. Yoriqni olib tashlab, gipsokarton bilan ta’mirlab berishdi. Bu qo‘shimcha hojatxona va yuvinish xonalarining devorlari”, — deydi bog‘cha direktori Bibigul Ahmedova.
Ma’lumot o‘rnida, respublikada so‘nggi 4 yil ichida maktabgacha ta’lim tashkilotlari soni 3 barobarga oshib, 5200 tadan 14200 taga yetdi. Bolalarni qamrab olish esa 54 foizga yetkazilgan. Davlat xususiy sheriklik mexanizmi joriy etilishi natijasida 223 mingdan ortiq o‘ringa ega bo‘lgan 7400 ta xususiy bog‘cha tashkil qilindi.
Avvalroq Toshkentning Anhor kanali ustidagi piyodalar ko‘prigi ustunlari yemirilayotgani tasvirlangan suratlar tarqalgan holat yuzasidan “O‘zbekiston temir yo‘llari” izoh bergandi. Undan avval Chirchiq daryosi ustiga qurilgan ko‘prik yaroqsiz holga kelayotgani tasvirlangan video yuzasidan holat voqea joyiga borib, mutaxassislar ishtirokida o‘rganilgandi. Ekspertlarning xulosasiga ko‘ra, ko‘prik atrofdagi shag‘al qazuvchilar sabab yaroqsiz holga kelib qolgan.
Shu yilning sentabr oxirlarida esa Surxondaryoning Qumqo‘rg‘on tumanidagi 6,5 milliard so‘mga qurib bitkazilgan ko‘prik hech qancha vaqt xizmat ko‘rsatmay qulab tushgani to‘g‘risida xabar berilgandi. Keyinroq viloyat hokimligi sifatsiz ko‘prik qurgan quruvchi ishini dastlab jinoyat ishi ochishni rad etgan transport prokuraturasi o‘rganayotganini ma’lum qilgandi.
Izoh (0)