O‘zbekistonda koronavirusni qayta yuqtirishda gumon qilinayotgan bemorlarga tavsiyalar berildi

Koronavirusga qarshi kurash shtabi a’zosi Sevara Ubaydullayeva AOKA huzurida tashkil etilgan brifingda o‘zida koronavirus infeksiyasini qayta yuqtirish alomatlarini sezayotgan bemorlarga tavsiyalar berib o‘tdi.

Jumladan, mutaxassis “Men hid va ta’m bilishni yo‘qotdim va grippda ham shunday bo‘ladi, deb yurdim, lekin hid bilishim qaytmadi, endi esa oila a’zolarimda ham shunday alomat bor. Lekin onam va dadamning ahvollari menikidan yomon o‘tyapti, COVID-19 deb o‘ylab ukol dorilarni olishmoqda. Savolim shuki, kasallik menda yana qayta bo‘lishi mumkinmi? Men ishlayman, men tashuvchi bo‘lib yurgan bo‘lishim mumkinmi, chunki yana bosh og‘rig‘i kabi hamma shamollash alomatlari boshlandi. Test topshirmadik, menda yana o‘sha belgilar takrorlanyapti, lekin shunda ham ishga borib yuribman, nima qilishim kerak?”, — degan savolga javob berib o‘tdi.

Birinchi bor kasallik alomatlari kuzatilganda shifokorga murojaat qilmagan bo‘lsangiz, hozirgi kunda oilaviy poliklinika yoki hududlarda yashasangiz, qishloq vrachlik punktlari, qishloq oilaviy poliklinikadagi oilaviy shifokorlarga murojaat etib nazoratida turing. Sizda alomatlar davom etayotgan yoki kasallik hali ham bo‘lishi mumkin. Kasallikni davolash maqsadida sizga kerakli dori vositalari yoki qo‘shimcha tadbirlar, karantin qoidalariga rioya qilish bo‘yicha tavsiyalar beriladi.

Sevara Ubaydullayeva, Koronavirusga qarshi kurash shtabi a’zosi

Shuningdek, mutaxassis savol egasiga uy sharoitida davolanayotgan ota-onasining ukol olishni to‘xtatgan holda oilaviy shifokor nazoratida turish, kasallik holatini o‘rgangan holda statsionarga yotqizishni tavsiya qilgan. Bemorning kasallik tashuvchisi ekanligini aniqlashda Sevara Ubaydullayeva kasallik kechish jarayoni, alomatlar boshlangan kunidan necha kun o‘tgani, PZR testi uchun olingan surtma natijasiga qaralishini bildirgan. O‘zida kasallik alomatlarini sezayotgan yoki koronavirus qaytalanish ehtimolini gumon qilayotgan odamlarga ishga bormasdan uyda qolishni ta’kidlab o‘tgan.

Eslatib o‘tamiz, avvalroq O‘zbekistonning bosh sanitar inspektori va Koronavirusga qarshi kurashish shtabi a’zosi Nurmat Otabekov dunyoda COVID-19 yoppasiga qaytadan hammada qayd etilishi to‘g‘risida bironta ham asoslangan ilmiy ma’lumot yo‘qligini bildirgan. Uning fikricha, agar shu kabi holatlar laboratoriyada COVID-19 virusi borligi tasdiqlangan taqdirda ham bunga bitta kasallik bilan ikkinchi marta kasallanish sifatida qarash kerak emas. Buni shu bilan izohlash mumkinki, kasallik yuqtirib olgan organizm undan to‘liq tuzalib ulgurmagan yoki laboratoriya tekshiruvlarida test tizimlari bilan bog‘liq muammolar bo‘lishi mumkin. Shuningdek, koronavirusdan tuzalgan bemorlarga uning boshqa turlaridan himoyalanish tavsiya etilgan.