Ўзбекистонда коронавирусни қайта юқтиришда гумон қилинаётган беморларга тавсиялар берилди

Коронавирусга қарши кураш штаби аъзоси Севара Убайдуллаева АОКА ҳузурида ташкил этилган брифингда ўзида коронавирус инфекциясини қайта юқтириш аломатларини сезаётган беморларга тавсиялар бериб ўтди.

Жумладан, мутахассис «Мен ҳид ва таъм билишни йўқотдим ва гриппда ҳам шундай бўлади, деб юрдим, лекин ҳид билишим қайтмади, энди эса оила аъзоларимда ҳам шундай аломат бор. Лекин онам ва дадамнинг аҳволлари меникидан ёмон ўтяпти, COVID-19 деб ўйлаб укол дориларни олишмоқда. Саволим шуки, касаллик менда яна қайта бўлиши мумкинми? Мен ишлайман, мен ташувчи бўлиб юрган бўлишим мумкинми, чунки яна бош оғриғи каби ҳамма шамоллаш аломатлари бошланди. Тест топширмадик, менда яна ўша белгилар такрорланяпти, лекин шунда ҳам ишга бориб юрибман, нима қилишим керак?», — деган саволга жавоб бериб ўтди.

Биринчи бор касаллик аломатлари кузатилганда шифокорга мурожаат қилмаган бўлсангиз, ҳозирги кунда оилавий поликлиника ёки ҳудудларда яшасангиз, қишлоқ врачлик пунктлари, қишлоқ оилавий поликлиникадаги оилавий шифокорларга мурожаат этиб назоратида туринг. Сизда аломатлар давом этаётган ёки касаллик ҳали ҳам бўлиши мумкин. Касалликни даволаш мақсадида сизга керакли дори воситалари ёки қўшимча тадбирлар, карантин қоидаларига риоя қилиш бўйича тавсиялар берилади.

Севара Убайдуллаева, Коронавирусга қарши кураш штаби аъзоси

Шунингдек, мутахассис савол эгасига уй шароитида даволанаётган ота-онасининг укол олишни тўхтатган ҳолда оилавий шифокор назоратида туриш, касаллик ҳолатини ўрганган ҳолда стационарга ётқизишни тавсия қилган. Беморнинг касаллик ташувчиси эканлигини аниқлашда Севара Убайдуллаева касаллик кечиш жараёни, аломатлар бошланган кунидан неча кун ўтгани, ПЗР тести учун олинган суртма натижасига қаралишини билдирган. Ўзида касаллик аломатларини сезаётган ёки коронавирус қайталаниш эҳтимолини гумон қилаётган одамларга ишга бормасдан уйда қолишни таъкидлаб ўтган.

Эслатиб ўтамиз, аввалроқ Ўзбекистоннинг бош санитар инспектори ва Коронавирусга қарши курашиш штаби аъзоси Нурмат Отабеков дунёда COVID-19 ёппасига қайтадан ҳаммада қайд этилиши тўғрисида биронта ҳам асосланган илмий маълумот йўқлигини билдирган. Унинг фикрича, агар шу каби ҳолатлар лабораторияда COVID-19 вируси борлиги тасдиқланган тақдирда ҳам бунга битта касаллик билан иккинчи марта касалланиш сифатида қараш керак эмас. Буни шу билан изоҳлаш мумкинки, касаллик юқтириб олган организм ундан тўлиқ тузалиб улгурмаган ёки лаборатория текширувларида тест тизимлари билан боғлиқ муаммолар бўлиши мумкин. Шунингдек, коронавирусдан тузалган беморларга унинг бошқа турларидан ҳимояланиш тавсия этилган.