Farg‘ona viloyatidagi fuqaroning Gentra rusumli avtomashinasini o‘g‘irlab ketgan avtomobil yuvish shoxobchasida ishlovchi shaxs qo‘lga olindi, deya xabar bermoqda YHXBB.
Ma’lum qilinishicha, 2020-yil 16-oktabr kuni soat 16:00 larda o‘zganing Gentra rusumli avtomobilini yuvib berishni va’da qilgan shaxs ushbu mashinani o‘g‘irlab ketgan.
“Ikki soatda chiqasiz degandi, chiqsam mashinam yo‘q. Keyin 102 ga telefon qildim”, – deydi mashina egasi.
Viloyat IIB navbatchilik qismiga berilgan xabar sohaviy xizmatlarga yetkazilib, olib qochilgan Gentra rusumli avtomobilni aniqlash choralari ko‘rildi. Mashinani olib qochgan haydovchi spirtli ichimlik iste’mol qilgan holda o‘zgaga tegishli bo‘lgan transport vositasini sotmoqchi bo‘lgan vaqtda qo‘lga olindi.
“Gumonlanuvchi Universitet ko‘chasidagi shina montaj ustaxonasi oldida avtomobil yukxonasidagi zaxira ballonini sotayotgan vaqtida qo‘lga olindi”, – deydi YPX inspektori. Qo‘lga olingan shaxs pul kerak bo‘lib qolgani uchun ballonni sotmoqchi bo‘lganini aytgan.
Ma’lumot uchun, ushbu jinoyatni sodir etgan shaxs Jinoyat kodeksining 267-moddasida (transport vositasini olib qochish) belgilangan jazo, ya’ni 20 yilgacha ozodlikdan mahrum qilish bilan jazolanishi mumkin.
Avvalroq Surxondaryoda Captiva olib qochgan 29 yoshli yigit, Farg‘ona viloyatida avtomashina olib qochgan mast holdagi 17 yoshli bola va Toshkent viloyatida Spark avtomobilini egasi ko‘z o‘ngida olib qochgan xavfli retsidivist qo‘lga olingani haqida xabar berilgandi.
Izoh (0)