Фарғона вилоятидаги фуқаронинг Gentra русумли автомашинасини ўғирлаб кетган автомобиль ювиш шохобчасида ишловчи шахс қўлга олинди, дея хабар бермоқда ЙҲХББ.
Маълум қилинишича, 2020 йил 16 октябрь куни соат 16:00 ларда ўзганинг Gentra русумли автомобилини ювиб беришни ваъда қилган шахс ушбу машинани ўғирлаб кетган.
«Икки соатда чиқасиз деганди, чиқсам машинам йўқ. Кейин 102 га телефон қилдим», – дейди машина эгаси.
Вилоят ИИБ навбатчилик қисмига берилган хабар соҳавий хизматларга етказилиб, олиб қочилган Gentra русумли автомобилни аниқлаш чоралари кўрилди. Машинани олиб қочган ҳайдовчи спиртли ичимлик истеъмол қилган ҳолда ўзгага тегишли бўлган транспорт воситасини сотмоқчи бўлган вақтда қўлга олинди.
«Гумонланувчи Университет кўчасидаги шина монтаж устахонаси олдида автомобиль юкхонасидаги захира баллонини сотаётган вақтида қўлга олинди», – дейди ЙПХ инспектори. Қўлга олинган шахс пул керак бўлиб қолгани учун баллонни сотмоқчи бўлганини айтган.
Маълумот учун, ушбу жиноятни содир этган шахс Жиноят кодексининг 267-моддасида (транспорт воситасини олиб қочиш) белгиланган жазо, яъни 20 йилгача озодликдан маҳрум қилиш билан жазоланиши мумкин.
Аввалроқ Сурхондарёда Captiva олиб қочган 29 ёшли йигит, Фарғона вилоятида автомашина олиб қочган маст ҳолдаги 17 ёшли бола ва Тошкент вилоятида Spark автомобилини эгаси кўз ўнгида олиб қочган хавфли рецидивист қўлга олингани ҳақида хабар берилганди.
Изоҳ (0)