Bugun,

  • USD 11014.01
  • RUB 191.8
  • EUR 10674.78

O‘zbekiston Davlat soliq qo‘mitasi raisi Sherzod Kudbiyev ijtimoiy tarmoqlarda tarqalgan va qo‘l ostidagi xodimiga haqoratli so‘zlar bilan tanbeh bergani aks etgan audiyozuvga izoh berdi.

Sherzod Kudbiyev.

Sherzod Kudbiyev.
Foto: “Daryo” / Madina Nurman

Ijtimoiy tarmoqlarda tarqalgan audioyozuvda qo‘mita rahbari o‘z xodimini berilgan topshiriqni bajarmagani uchun ba’zi haqoratli so‘zlar bilan urishayotganini eshitish mumkin.

Shuningdek, audioyozuv bilan birga ijtimoiy tarmoqqa joylangan videoda qo‘mita rahbari hech qanday asoslarsiz Davlat soliq qo‘mitasining binosida qayta ta’mirlash ishlarini olib borayotgani aytilgan.

“Audioyozuvdagi keskin fikrlar va Alter Ego loyihasiga berilgan intervyu borasida: Men rahbar shaxs og‘ir vaziyatlarda ham vazminlik bilan harakat qilishi lozimligi to‘g‘risidagi fikrimda qat’iy turaman va yuqoridagi holatda o‘zim shu fikrga qarshi harakat qilganimni tan olaman. Yuzaga kelgan vaziyatda mas’uliyatni his qilgan holda men yuqoridagi xodim bilan alohida suhbatlashdim va biz birgalikda yoqimsiz hodisaga to‘liq barham berdik. Lekin bu meni mas’uliyatdan forig‘ qilmaydi”, — deyiladi Sherzod Kudbiyevning izohida.

Sherzod Kudbiyevning so‘zlariga ko‘ra, binolarni rekonstruksiya qilish va Davlat soliq qo‘mitasining moddiy-texnik bazasini mustahkamlashga qaratilgan boshqa tadbirlarning har biri bo‘yicha qonuniy asos mavjud va bu jarayonlar tegishli nazorat organlarining kuzatuvi ostida amalga oshirilmoqda.

“Videoning tarqalishi borasida quyidagilarni aytib o‘tmoqchiman.

Hech kimga sir emaski, soliq tizimida islohotlar boshlangan, shu bilan birga, juda ko‘p muammolar yig‘ilib qolgan. Afsus bilan aytish kerakki, haligacha ayrim holatlarda tadbirkorlarga nisbatan ‘sog‘in sigir’ sifatida qarab, ularning hisobidan o‘z xizmat vazifalarini, eng yomoni — ayrim hollarda esa shaxsiy manfaatlarini ko‘zlayotgan shaxslar uchrab turibdi.

Yuqoridagi videoda aynan shunday holatlar muhokama qilingan edi. Birinchi holatda — tadbirkorga ortiqcha to‘langan QQS summasi o‘z vaqtida qaytarilmagan, ikkinchi holatda — asossiz ravishda hisob-raqam band qilinib, undagi mablag‘lar undirilmoqchi bo‘lgan.

Masaladan yaqindan xabardor bo‘lganlar yaxshi biladiki, xodimlarning bunday mas’uliyatsiz xatti-harakatlari videoda aytib o‘tilgan ikkala tashkilotning ham faoliyati to‘xtatilishi kabi jiddiy oqibatlarga olib kelgan edi. Hozirda ushbu korxonalarning faoliyati to‘liq qayta tiklanishiga erishildi.

Afsuski, bugungi kunda bu kabi masalalarni hal etishda shaxsan mening aralashuvim talab etilmoqda”, — deya ta’kidlagan Sherzod Kudbiyev.

DSQ raisining ma’lum qilishicha, yaqin kelajakda soliq organlari tomonidan tadbirkorlar faoliyatiga qasddan yoki tasodifan aralashuv imkoniyatini butunlay yo‘qqa chiqaradigan yangi tizimni ishlab chiqish ustida ish olib borilmoqda. “Bunday yangiliklar kimgadir yoqadi, kimgadir esa yo‘q. Tizimdagi o‘zgarishlarga qarshi bo‘lganlar turli usullar bilan o‘zgarishlarga qarshilik qilishga harakat qiladi”, — deya qo‘shimcha qilgan Kudbiyev.

“Lekin barcha tushunishi kerakki, biz oldimizga soliq tizimini tadbirkorlarga ko‘mak beradigan tizimga aylantirish bo‘yicha aniq maqsad qo‘yganmiz.

Bu juda murakkab jarayon bo‘ladi va hamma ham biz bilan bu yo‘lni oxirigacha birga bosib o‘tolmasligi mumkin, kim bilandir xayrlashishga to‘g‘ri keladi, kim bilandir allaqachon xayrlashdik. Lekin bir masalada ishonchim komilki, xodimlarimizning katta qismi ushbu o‘zgarishlarni to‘liq qo‘llab-quvvatlaydi va ularni amalga oshirishda faol ishtirok etadi”, — degan Sherzod Kudbiyev.

Qo‘mita rahbarining bildirishicha, yuqoridagi holat bo‘yicha qo‘mita hay’atining navbatdan tashqari yig‘ilishi o‘tkazilgan. Unda yuqoridagi masalalar atroflicha muhokama qilingan va tashkilot faoliyatini yanada yaxshilash bo‘yicha xulosalar qilingan.

Izoh
Asosiy yangiliklar
Dunyo
Rim papasi Putin va Zelenskiyga murojaat yo‘lladi
Sport
APL. “Manchester Siti” 9 ta gol urilgan derbida “Manchester Yunayted”ni tor-mor etdi. Holand va Fodendan het-trik
Sport
Superliga. “Nasaf” Toshkentda “Paxtakor”ni mag‘lub etib, yakka peshqadamga aylandi