Андижонда ўз ўғлини сўкиб, ҳақоратлаган ота иккинчи маротаба судланди. Бу ҳақда «Дарё»га Жиноят ишлари бўйича вилоят суди судья катта ёрдамчиси Комроншоҳ Расулов маълум қилди.
Таъкидланишича, Андижон вилоятида яшовчи 64 ёшли Ўктам Бўриев 2019 йил 19 сентябрь куни ўғлини ҳақорат қилгани учун Маъмурий жавобгарлик тўғрисидаги кодекснинг 41-моддасига мувофиқ жарима тўлаган. Ота 2020 йил 11 июль куни соат 08:40 да ўзи билан қўшни бўлиб яшайдиган ўғли Достон Бўриевни яна ҳақорат қилган. Ота ўғли унга тегишли бўлган бодомларни тераётганлигини кўриб жаҳли чиққач, ўғлини уятсиз сўзлар билан ҳақорат қилган. Бундан ташқари йўл четида турган тошлардан олиб ўғлига тегишли Nexia-2 автомашинасига отган.
Судланувчининг айби, ўғилнинг аризаси, ишдаги мавжуд ёзма далиллар, жумладан, тушунтириш хатлари, гувоҳларнинг кўрсатмалари, юзлаштириш баённомалари ҳамда иш бўйича тўпланган бошқа далиллар йиғиндиси билан ўз исботини топган.
Суд судланувчи Ўктам Бўриевни ўғли Достон Бўриевнинг шаъни ва қадр-қимматини беодоблик билан қасддан таҳқирлаб, уни ҳақорат қилганликда ифодаланган ҳаракатлари билан Жиноят кодексининг 140-моддасининг 1-қисмида (ҳақорат қилиш) назарда тутилган жиноятни содир этган деган тўхтамга келиб, унга нисбатан базавий ҳисоблаш миқдорининг беш баравари миқдорида — 1 миллион 115 минг сўм жарима жазоси тайинлаган.
Изоҳ (0)